Duro harron miqtë: E mundim Partizanin
Driblon Starovën për shtrëngimin e dorës: Nuk e komentoj...
Shpëtim Duro kërkon tri pikët sot në ndeshjen me Partizanin, që luhet në Vlorë, në orën 17:00. E, ndërsa vlerëson maksimalisht kundërshtarin, Duro beson te suksesi, pasi skuadra e tij nuk ka ndryshuar fizionominë në merkaton e dimrit, ndërsa Partizani po. Në konferencën e djeshme për shtyp, Duro tha se te Flamurtari është rritur ndjeshëm konkurrenca në fazën sulmuese. "Fillojmë pjesën e dytë të kampionatit me një ndeshje të veçantë. Kemi përballë një skuadër me emër të madh në futbollin shqiptar, siç është Partizani, dhe kjo është pozitive. Është një përballje tradicionale, shumë gjë e bukur për t'u ndjekur. Skuadra e Flamurtarit ka bërë më pak lëvizje në raport me skuadrat e tjera edhe ndaj Partizanit që ka bërë shumë afrime. Ne kemi bërë katër afrime dhe pesë largime. Skuadra jonë është po ajo e fazës së parë, ndryshimet janë shumë të vogla. Kemi rritur konkurrencën më shumë në repartin sulmues. Ne do të kemi po atë fizionomi dhe kemi futbollistë me kualitet që kanë ardhur në merkaton dimërore dhe shpresojmë të rrisim cilësinë e lojës dhe pjesën sulmuese. Kështu që edhe në këtë ndeshje me Partizanin, do të jetë formacioni bazë. Do të jetë ai që kemi luajtur në dy fazat e para me ndryshime
të vogla, të kushtëzuar edhe nga Muarem, që është një nga afrimet më cilësore dhe që nuk është i gatshëm për këtë ndeshje për shkak të dëmtimit. Në formacion do të kemi një ose dy ndryshime nga ai Flamurtar i pjesës së parë të sezonit",
tha fillimisht Duro. EMOCIONET
Ndeshja e sotme me Partizanin është emocionuese për trajnerin Shpëtim Duro. Tekniku këtë fakt nuk e fsheh, pasi ka qenë si futbollist ashtu edhe trajner te Partizani, si dhe shumë miq. "Normalisht që, për mua, të luaj kundër Partizanit është një ndjesi e veçantë, pasi pjesën më të madhe të punës dhe karrierës sime si futbollist dhe trajner e kam kaluar te Partizani. Kam miq aty, kam shok shumë edhe te stafi drejtues, kam dhe lojtarë që i kam pasur në ekip. Por edhe nga tifozët e Partizanit kam pasur përkrahje maksimale. Është një ndeshje e veçantë, por jam profesionist si të gjithë trajnerët e tjerë dhe dua të bëj më të mirën me Flamurtarin. Po mbush vitin që jam në Vlorë dhe, sinqerisht, them se ndihem jashtëzakonisht mirë nga të gjitha aspektet, pasi çdo gjë ka kaluar pozitivisht dhe dua të bëj më të mirën", tha Duro. I pyetur nga "Panorama Sport" për deklaratën e Starovës se priste që t'i shtrëngonte dorën, Duro dribloi: "Nuk kam asnjë koment".