Reali monitoron Miralem Pjaniçin
Perez, gati të shesë Krosin në Angli ose t'i ofrojë një shkëmbim kokë me kokë Juves
Miralem Pjaniç përfundon në shënjestrën e Reali të Madridit dhe këtë e garanton revista "Don Balon". Ky burim mediatik, i cili gjithmonë ofron lajme bombastike (nuk mund të lihet pa përmendur se ishte kjo media që nënvizoi se kalimi i Nejmarit te PSG-ja, ishte një trampolinë për Realin e Madridit), këtë herë garanton se në verë, vetë presidenti i "galaktikëve", Florentino Perez, do të marrë në dorë tratativën për të sjellë në "Santiago Bernabeu" fantazistin e bardhezinjve. Duke përfituar nga marrëdhëniet e shkëlqyera që vetë numri një i madrilenëve ka me homologun e tij të Juventusit, Andrea Anjeli, ai do të kërkojë të bindë miliarderin torinez, që t'i lejojë transferimin e 27-vjeçarit në kryeqytetin spanjoll. Vetë Florentino Perez ka komplimentuar disa herë Juven për merkaton e kryer, aq sa duke nisur nga lojtarë si Pogba, apo Bonuçi, Kielini, Dibala e tashmë edhe Pjaniç, kanë qenë gjithmonë në listën e tij të shpenzimeve. "Don Balon", në investigimin e tij, ofron gjithashtu edhe mundësitë që kjo tratativë të ketë një fund të lumtur në sesionin e transferimeve të verës. Duke lënë mënjanë se si do të shkojë çështja "Kristiano Ronaldo", Reali i Madridit është gati që të investojë 60-70 milionë euro për boshnjakun Pjaniç. Këto parà pritet që të mos nxirren nga arkat e klubit, por ideja e presidentit Perez është që të sakrifikojë mesfushorin Toni Kros. Gjermani ka kërkesa fantastike nga Anglia, ku Mançester Junajtid dhe Siti janë gati që të paguajnë shumë miliona për të. Por, duke qenë se Toni Kros, është edhe një ëndërr e presidentit bardhezi, Andrea Anjeli, ndoshta ky i fundit dhe Florentino Perez mund të gjejnë një akord të përbashkët, për një shkëmbim kokë më kokë mes të dyve. Natyrisht, që nëse presidenti i Realit do ta mirëpriste këtë
marrëveshje, duke parë admirimin për Pjaniçin, i takon Juventusit që të punojë bindshëm për të bindur Krosin që të transferohet në Torino, duke qenë se nga Anglia, Junajtid dhe Siti janë gati ta rivalizojnë me një pagë multimilioneri.