Abazaj “fik” Skënderbeun, Kukësi spektakël në Shkodër
Debutim fantastik i Pakultit, Vllaznia zhgënjen para 4700 tifozëve
Katër fitore radhazi, lojë dhe gola spektakolarë dhe, mbi të gjitha, dominim ndaj skuadrës më të mirë të futbollit shqiptar. Luftëtari nuk pyet as për Skënderbeun duke i dhënë dje një leksion të mirë në ndeshjen e parë zyrtare për këtë vit në kampionat. Skuadra e Hasan Likës fitoi pastër, 2-0, falë dopietës së Kristal Abazajt, që kurseu festimin e shfrenuar në respekt të klubit të Skënderbeut, që ka derdhur 200 mijë euro në arkën e Luftëtarit për të blerë kartonin e tij. Kjo fitore e gjirokastritëve ndaj korçarëve vjen pas 18 vitesh sa u përket ballafaqimeve në Superiore, pasi për herë të fundit kishin triumfuar 3-0 më 9 dhjetor 2000 me gola të ish-sulmuesve të njohur, Edi Martini, Gentjan Begeja dhe Arlind Nora. Dje "skenën" e mori Abazaj, i cili zvogëloi mbrojtjen e hekurt të Skënderbeut duke e thyer pas 47 ditësh. Kjo ishte humbja e dytë në kampionat e bardhekuqve pas asaj në Laç më 10 dhjetor të vitit 2017. Në Gjirokastër, skuadrën e Dajës e tradhtuan edhe nervat, teksa Marko Radas u ndëshkua me të kuq.
PJESA E PARË - Skënderbeu e nis frikshëm duke gjetur të përgjumur Luftëtarin. Xhejms godet traversën, me korçarët që kërkojnë të imponojnë që në start. Mirëpo, nuk zgjat as 60 sekonda nga ky rast dhe mbrojtësi i majtë i Luftëtarit, Xhekson Ferreira, lëshon një predhë nga jashtë zone duke kërcënuar portën e Shehit. Loja ekuilibrohet ndjeshëm, edhe pse Xhejms është gjithnjë rrezik për mbrojtjen bluzi sa herë prek topin. Mirëpo, trajneri Lika është i detyruar për të bërë zëvendësimin e parë që në minutën e 4-t, kur Oltion Rapa pëson një tërheqje muskulore dhe në vend të tij aktivizohet i rikthyeri Liçaj. Daja e kishte nisur me nigerianin në majën e sulmit për shkak të problemeve fizike të Ali Souesë, që ishte ulur në stol. Me kalimin e minutave është Luftëtari që bëhet i frikshëm. Fillimisht Abazaj godet rrjetën e jashtme, ndërsa më pas korrigjon shënjestrën duke mposhtur Shehin. Vertikalizimi i Bregut ishte mjeshtëror, po ashtu edhe finalizimi. Korçarët shokohen dhe rrezikojnë të pësojnë sërish, kur Abazaj kalon edhe Shehin, por godet traversën. Më pas është radha e Bregut, që shpërdoron i vetëm përballë Shehit. Në 10
minutat e fundit të pjesës së parë Skënderbeu shton presionin dhe Xhejms ka shansin e artë për të barazuar, por Ruçi shpëton Luftëtarin dhe gjithçka për këtë pjesë mbyllet 1-0.
PJESA E DYTË - Pas pushimit është Luftëtari që i afrohet golit të dytë me Bregun
nga goditja e dënimit. Korçarët mundohen të qarkullojnë topin, për të shkuar te porta bluzi me një rrjedhë logjike, por Beqiri dhe Jakovljeviç në qendër nuk lënë hapësira. Për shumë minuta kemi një dominim të bardhekuqve, por mungojnë rastet e pastra për
gol. Vila mund të barazonte, por shpërdoroi përballë Ruçit. Daja hedh në fushë edhe Souenë, teksa Skënderbeut bëhet i frikshëm. Mirëpo, në momentin më të mirë të kryesuesve, është Radas që prish ekuilibrat duke u ndëshkuar me të kuq pas një faulli në mesfushë
që vijoi me një fyerje ndaj tifozëve. Për Luftëtarin gjithçka bëhet më e lehtë dhe Lika largon Vasil Shkurtajn, i cili bëri një debutim pozitiv për të forcuar mesfushën me Rapon dhe Mingën. Ky i fundit, në prekjen e parë të topit "shpik" një asist për Abazajn, që "fluturon"
në mbrojtjen korçare duke shënuar golin e dytë pas një të djathte perfekte. Në minutat e fundit, gjirokastritët kanë shanse të shënojnë edhe golin e tretë, por Bregu është i pafat, pasi nga i njëjti pozicion si i Abazajt është portieri Shehi që këtë herë reagon shkëlqyer.