Shehi tërbohet me mbrojtësit, Daja kthen lojtarët nga tuneli
* Temperaturat e ulëta në qytetin e Gjirokastrës nuk e kanë prishur aspak tapetin e stadiumit. Dje, dyert u hapën që në orën 10:00, me punëtorët e fushës që bënë vijëzimin për të qenë gjithçka OK.
* Të pranishëm në tribunën VIP ishin dy presidentët respektivë, Grigor Tavo i Luftëtarit dhe Ardjan Takaj i Skënderbeut. Pas shumë kohësh rikthehej të ndiqte Luftëtarin edhe deputeti Vangjel Tavo. * Edhe pse grupimi "Shqiponjat Bluzi" priste me padurim hapjen e dyerve të tribunës përballë, sërish policia nuk ua krijoji këtë mundësi. Ajo nuk e mori përsipër hapjen e këtij sektori, me argumentin se ka shkallë të amortizuara dhe mund të hidhen gurë në fushë.
* Si zakonisht, të pranishëm në shkallët e stadiumit "Gjirokastra" ishin shumë tifoze femra, mes të cilave të fejuarat e Behar Ramadanit dhe Eduard Rrocës. Nuk mund të bënin përjashtim as prindërit e Dejvi Bregut, që këtë sezon thuajse nuk kanë humbur asnjë takim. * Afro 1800 tifozë në shkallët e stadiumit, por me qindra të tjerë nga tarracat e pallateve, si dhe godina e konviktit të femrave të Universitetit "Eqerem Çabej". Çmimet e biletave ishin 200 lekë për sektorët anësorë, si dhe 500 lekë për tribunat A dhe B.
* Vasil Shkurtaj bëri debutimin me fanellën bluzi, por ajo që tërhoqi vëmendjen, ishin duartrokitjet e gjata nga tifozët gjirokastritë për sulmuesin pa nisur ende ndeshja, teksa ai po kryente nxehmjen.
* Rreth 30 tifozë korçarë nuk kanë reshtur së mbështeturi skuadrën e tyre. Pankarata e zakonshme "Ujqërit e Dëborës" ishte vendosin në rrethimin e sektorit mik.
* Batuta më pikante që erdhi nga shkallët e tribunës kryesore prej tifozëve ishte ajo drejtuar portierit të Luftëtarit. "O Ruçi, mos e jep topin e parë direkt te Shkurtaj se nuk është Maradona!".
* Kur Abazaj realizoi golin e parë për Luftëtarin, në tribunën qendrore dëgjohej shpesh thirrja: "Luani me Barcelonën në Gjirokastër, o korçarë...!".
* Pas pushimit mes pjesëve, braziliani i Luftëtarit, Marko Aurelio, ka takuar përzemërsisht mbrojtësin e Skënderbeut, Kristi Vangjeli. Të dy kanë luajtur afro 10 vite më parë te Arisi i Selanikut.
* Në fund të ndeshjes ka shtrëngim duarsh dhe përqafim miqësor mes trajnerëve Hasan Lika dhe Ilir Daja.
* Disa fëmijë kanë pritur Kristal Abazajn për të ndarë fotografi me heroin e Luftëtarit.
* Futbollistët e Skënderbeut janë parë në shoqërinë e pijeve freskuese pas përfundimit të ndeshjes, ndërsa autobusi u shoqërua nga forcat e rendit deri në dalje të qytetit.
* Në minutën e 92-të, pas një kundërsulmi të Luftëtarit, portieri dhe njëkohësisht kapiteni i Skënderbeut, Orges Shehi, u tërbua me shokët e skuadrës duke goditur një top në anësore në shenjë revoltë. Durrsaku e kishte më së shumti me mbrojtësit e krahut: Vangjeli dhe Mici.
* Pasi gjyqtari sinjalizoi përfundimin e takimit, disa prej lojtarëve të Skënderbeut iu drejtuan direkt dhomave të zhveshjes, por një urdhër i Dajës i ktheu: "Ku po shkoni? Shkoni urgjent përshëndesni tifozët!".