Mallkimi me dritat, shkodranët duartrokasin Gurin
Nga thirrje për Sukajn e deri te "mallkimi" për dritat. Ja disa nga të veçantat në ndeshjen e djeshme të luajtur në Shkodër mes Vllaznisë dhe Kukësit.
-"Sukaj! Sukaj!", ishin thirrjet e tifozërisë shkodrane në startin e takimit. Sulmuesi shkodran është kthyer pas disa vitesh tek ekipi i tij i zemrës. Por, ballafaqimi i tij i parë me ngjyrat kuqeblu nuk ka qenë ai që të gjithë kanë pritur.
-Ambient elektrizues në fillim të takimit. Tifozëria shkodrane i është përgjigjur me mbështetjen e vet ekipit. Një numër i lartë nisur me pozicionin në të cilin ndodhet Vllaznia. Një numër që i kalonte 4500 të pranishëm. Biletaria ka qenë funksionale edhe pas startit të takimit. Mirëpo Vllaznia sërish ka humbur, duke humbur kështu tifozërinë e saj. -Starti i vitit e gjen të përfunduar tërësisht edhe stadiumin "Loro Boriçi". Pista e tartanit i ka dhënë një tjetër pamje stadiumit tashmë të përfunduar. -Ka qenë minuta e 28-të dhe tifozëria e lojtarë shkodranë kanë protestuar ashpër ndaj gjykimit. Nuk i kanë kursyer as ofendimet ndaj treshes lezhjane.
-Sindri Guri nuk feston për golin që i shënon ekipit prej nga doli. Tifozëria shkodrane e duartroket shkodranin e Kukësit, duke ia kthyer reston me shumë dashamirësi.
-Ka qenë minuta e 72-të e takimit dhe në zonën shkodrane ka një përplasje mes Kales e Orelesit. Kale godet mesfushorin shkodran, por për gjyqtarin Hamiti nuk ka as karton të verdhë për sulmuesin e skuadrës mike.
-Menjëherë pas përfundimit të takimit, tekniku Pakult i ka nxjerrë lojtarët e tij sërish në fushë. Kjo për disa minuta ku kanë zhvilluar disa vrapime rreth fushës.
-Dritat janë mallkim për Vllazninë e po ashtu edhe mbështetja e tifozërisë nuk po sjell fat për ekipin. Kanë qenë të shumtë supersticiozët që zhvillimin e takimit me drita e kanë jofatsjellës për ekipin e tyre. Statistikat flasin shumë negativisht për Vllazninë kur takimet i kanë zhvilluar nën dritën e projektorëve.
-Gjoka, shumë i nervozuar në fund të takimit. Nervozitetin e ka pasur me një nga lojtarët e tij, që, sipas tij, ka reaguar pas pësimit të golit të tretë.