Tripletë e Kamzës, Laçit nuk i mjafton penalltia
Kurbinasit e nisin keq, bind skuadra e Ndreut
Kamzës i mjaftojnë vetëm 3 minuta lojë për të treguar që edhe pjesa e mbetur e kampionatit në vitin 2018 do të flasë pozitivisht për ta. Një aksion i shpejtë i kryeqytetasve, që kulmon me një goditje nga këndi, shndërrohet në gol në momentin e krosimit në zonë të Zguros, i cili kthehet me kokë nga Fukui në qendër të zonës për Ymerajn, që realizon të parin gol të Superiores për vitin 2018.
Faktori 3 - E si të mos mjaftonte kombinimi i numrave 3, po kaq gola do të realizojë deri në fund skuadra e drejtuar nga trajneri Ndreu me tre autorë të ndryshëm (Ymeraj 3', Imeri 74' dhe Mehmeti 86'), të cilët i dhanë tri pikë Kamzës në javën e 17-të dhe të parën për vitin kalendarik 2018. Në të tretën minutë të shtesës, i sapo-futuri Mehmeti, gjuan tokazi për të sigluar 3- 1, pas pasimit të Frashërit në hyrje të zonës. Në momentin e mbarimit të takimit, (pa u luajtur sfidat e orës 17: 00), kjo skuadër u ngjit përkohësisht në vendin e tretë, pasi triumfi në Shkodër ngjit Kukësin në këtë vend dhe e zbret të 4-ën…
Starti - Në fushë, Zguro debutonte për vendësit dhe Shtubina ishte titullar në debutimin me kurbinasit. Laçi nis vrullshëm, mirëpo është skuadra vendëse që tregon instinktin "vrasës". Në aksionin e parë të rrezikshëm, krosimi i Zguros drejt zonës kthehet me kokë nga Fukui dhe sfera gjen Ymerajn, i cili gjuan fluturimthi për të shënuar. Në vijim, Laçi tenton të reagojë duke fituar terren në fushë, por pa sukses. Raste për shënim, por minutat kalojnë pa ndryshim rezultati.
Furia "Laçi" - Fukui do të tentojë golin e sigurisë, por pa rezultat. Pasi kalojnë 20 minuta lojë, kurbinasit shtojnë marshin dhe rrezikojnë furishëm portën e vendësve me disa raste shënimi. Kallaku gjuan fuqishëm pa gjetur kuadratin, më pas Rexhinaldo provon pa forcë dhe e treta tentativë radhazi është me Nikën që gjuan mrekullisht pas krosimit të Uzunit, mirëpo këtë herë shtylla e djathtë pingule e portës së Kamzës, i mohon golin e barazimit. Deri në fund të këtij fraksioni, të dy ekipet do tentojnë, por mungon saktësia.
Penalltia - Mundi i miqve do të shpërblehet nga arbitri kryesor, i cili nuk mendohet dy herë në të 57-ën, pasi Gjoni rrëzohet në zonë pas kontaktit me Frashërin që e mban fort nga fanella. Rexhinaldo nuk shpërdoron më dhe e dërgon sferën në rrjetë, në anën e kundërt ku hidhet portieri. Baraspeshë dhe
duket se kurbinasit fitojnë besimin e duhur për t'i prishur punë Kamzës. Aksione identike në minutat 67 dhe 69. Në fillim Laçi me Rexhinaldon që pason për Xhixhën, por gjuajtja përfundon jashtë. Vendësit përgjigjen me Plakun që pason për Idrizajn dhe ky i fundit, pas
një driblimi, e dërgon sferën mbi tra.
Fitorja - Grinta e Kamzës nuk mungon dhe, në krahasim me Laçin, saktësia në manovrën sulmuese i bën më efikasë. Plaku bën më të mirën për të disatën herë, kroson për Imerin, i cili, pasi driblon për të
fituar hapësirë, godet mrekullisht nga e majta e zonës për të shënuar golin e avantazhit pas vetëm 4 minutash aktivizim. Laçi nuk dorëzohet, mirëpo stoli i Ndreut do të sjellë një tjetër gol, me Mehmetin që mbyll takimin në 3-1 për Kamzën, e cila nis mbarë 2018-ën.