Donaruma “djall”, Milani ngec në Udine
Spanjolli s’mjafton. Xhixho dhe Kalabria “dhurojnë” barazimin
Mbyllet 1-1 në "Dacia Arena" sfida mes Udinezes dhe Milanit. Ndoshta ishte rezultati më i drejtë duke parë edhe ecurinë e takimit. Milani kaloi i pari në avantazh dhe hungërima e friulanëve konkretizohet me autogolin Donarumës. Xhenaro Gatuzo sheh t'i shpëtojë nga duart fitorja e katërt radhazi në kampionat, teksa në nivel kalendari ky ndaj Udinezes ishte i dyti radhazi. Për sa u përket bardhezinjve, Odo vazhdon të bëjë edhe më pozitiv bilancin e tij.
KRYEVEPRA - Milani zbret në fushë pa shumë surpriza, me të përfolurin Andre Silva në majën e sulmit, teksa në mbrojtje Gatuzo sposton Kalabrian në të majtë dhe rithërret Abaten në të djathtë. Odo përgjigjet me 4-5-1. Me vetëm pesë minuta të luajtura, Rino kërkon kalimin në 4-1-4-1, me sulmuesin portugez që presionon tre mbrojtësit rivalë, punë që homologu Lazanja nuk e kryen si duhet. Kur nuk janë mbushur ende dhjetë minutat e para, Suso lëshon një predhë nga 30 metra, e cila prek pjesën e brendshme të traversës dhe përfundon në rrjetë. Bixarri mundohet, por nuk mund të ndalë golin e gjashtë në kampionat të spanjollit që konfirmohet kështu bomberi kuqezi pas tetë takimesh agjërim. Udineze vuan goditjen dhe mundohet të reagojë me De Polin dhe Lazanjën. Andre Silva ka shansin e ndeshjes, por nuk kuptohet mirë qëllimi i tij kur në vend të stopimit, zgjedh një goditje me kokë që përfundon lehtësisht në duart e portierit vendës. Odo provon të ndryshojë duke kaluar në 3-4-2-1 me De Pol në krah që duhet të mbështesë Lazanjën. Udineze godet fort, por muri kuqezi nuk bie pavarësisht se lëkundet keqani.
REAGIMI - Pjesa e dytë nis pa shkundje të mëdha, me emocionet më të forta të dhuruara nga VAR-i pas një kërkese të Lazanjës për faull brenda zonës nga Bonuçi. Arbitri Manganielo heziton disi, por me konfirmimin e asistencës teknologjike konfirmon vendimin e tij për të lejuar vazhdimin e lojës. Në minutën e njëzetë nisin zëvendësimet me Odon, që fut në fushë Vidmerin dhe Maksi Lopezin në vend të Pexelës dhe De Polit. Kartoni i dytë i verdhë i Kalabrias është si dritë në fund të tunelit dhe Udineze kërkon edhe ndihmën e Baliçit që merr vendin e Behramit. Me mbetjen më dhjetë veta, Gatuzo duhet të mbrohet dhe zgjedh ta bëjë duke hedhur në fushë Antonelin në vend të Bonaventurës. Vendësit arrijnë barazimin me autgol dhe Rino vendos të ruhet duke tentuar njëkohësisht kundërsulmin. Borinit dhe Kaliniçit u besohet misioni i ri, por është Suso ai që kërcënon më së shumti rivalët, me rezultatin që mbetet i pandryshuar deri në fund.