Tirana shënon sa për katër skuadra
"Djemtë e Detit" vuajnë në fundin e takimit, vetëm +2 nga zona e ftohtë e tabelës
Një ndeshje me dy fytyra dhe një sfidë e përfunduar në paqe. Laçi dhe Teuta kanë ndarë nga një pikë mes tyre. 90 minutat e zhvilluara në stadiumin "Laçi" kanë nxjerrë të kënaqur skuadrën durrsake, e cila ia del të marrë një pikë të artë pa shkëlqyer shumë, ndërkohë që vendësit e drejtuar nga Mezani kanë të drejtë të mbeten të zhgënjyer me rastet e shpërdoruara në fraksionin e dytë. Sfida përmbyllëse e fazës së dytë, 0-0, e gjen Laçin një pikë më pak sesa Kukësi, ndërsa Teutën në vend të tetë.
PJESA E PARË
Një ndeshje që nis vrullshëm për miqtë, edhe pse duket që në fillim se mungon cilësia në finalizimin e aksioneve. E vendosur mjaft mirë në prapavijë dhe me një mesfushë grintoze, "Djemtë e Detit" tentojnë që të diktojnë lopën dhe, me kalimin e minutave, fitojnë metra në fushë. Loja zhvendoset në gjysmëfushën e kurbinasve, të cilët nuk kanë grintën e zakonshme dhe humbasin shumë duele. Manovra sulmuese lë për të dëshiruar, për faktin se pasimi i fundit thuajse nuk realizohet asnjëherë për të finalizuar aksionet. Në minutat 15 dhe 19 janë dy mundësi të Teutës, por pa gjetur kuadratin. Uzuni me një kros në zonë për Qaqin, nuk shfrytëzohet si duhet nga ky i fundit, i cili nuk përfiton as nga dalja e pasigurt e portierit Kastrati. Rexhinaldo do të japë një shkëndijë, por, edhe pse galopon shpejt dhe fuqishëm drejt zonës, tregohet egoist dhe gjuan vetë, në vend që të pasonte. Sulmuesi do të realizojë në të 29-tën, por goli është i pavlefshëm, pasi asistenti Shaba ka vepruar drejt duke akorduar pozicion jashtë loje. Rasti i artë i Teutës do të mbyllë fraksionin e parë, me një goditje me kokë brenda zonës, por Selmani bën mrekullinë duke larguar një rrezik në kuadratin e tij. PJESA E DYTË
Për vendësit, ky fraksion nis me Bardhin që duhet t'i bëjë një vend Da Silvës. Laçi është
më kërkues dhe shton ritmin, por sërish has një vendosje të kujdesshme të Teutës në prapavijë që lë pak hapësira. Uzuni është protagonisti i manovrës sulmuese të vendësve, mirëpo tentativat e tij kanë hasur Kastratin në pozicion dhe shpesh nuk janë akorduar me Rexhinaldon
për të finalizuar me gol. 59', 73', 74' dhe 77' janë tentativa të mesfushorit të krahut të majtë, i cili ka krosuar dhe ka tentuar disa herë të godasë portën e Kastratit, por Teuta ia ka dalë që të ruajë rezultatin e bardhë. Në fund, nga një pikë për të dyja skuadrat, që duket
se kënaq vetëm miqtë për barazimin në transfertë, ndërkohë që të besuarit e Mezanit duhet të rifitojnë agresivitetin dhe grintën për të përballuar pjesën e dytë të sezonit. Vetëm dy pikë më shumë sesa Vllaznia, janë rrezik i madh për mbijetesën e Teutës.