Lushnja ndal Luftëtarin, arbitri “gol” tifozëve
Reziston ekipi i Dedjes, Shkurtaj dhe Abazaj shpërdorojnë
Pas katër fitoreve radhazi, Luftëtari ngec në një barazim pa gola në transfertën e Lushnjës. Ishte një 90minutësh i bukur në "Roza Haxhiu", teksa të dyja skuadrat e kërkuan fitoren, por në fund rezultati i bardhë i shkoi për shtat lojës që zhvilluan. Gjirokastritët i patën të gjitha shanset për të dalë me tri pikë nga Lushnja, por Vasil Shkurtaj dhe Kristal Abazaj shpërdoruan në mënyrë të pabesueshme raste të pastra. "Veterani" i portës së Lushnjës, Mikel Spahiu, ishte njeriu i ndeshjes, me disa pritje shpëtimtare. Verdhejeshilët e Hysen Dedjes ishin të kujdesshëm duke iu ruajtur kundërsulmit të bluzinjve. Në njëfarë mënyre, ata e fituan duelin me Abazaj & CO, edhe pse një pikë më shumë u shërbeu gjirokastritëve sesa lushnjarëve.
PJESA E PARË
Pa Dejvi Bregun, Oltion Rapën dhe Eri Lamçjen, Luftëtari zbriti në fushë me një formacion ndryshe, ndërsa te Lushnja binte në sy mungesa për shkak dëmtimi e Arbër Mones. Loja nis me gjirokastritët në sulm, por me kalimin e minutave, verdhejeshilët shtyjnë përpara. Gava dhe Papa në qendër të mesfushës punojnë shumë duke u munduar të ndalin çdo iniciativë të miqve, që nis nga këmbët e Aleksit, Ramadanit dhe Rrocës. Luftëtari bën goditjen e parë në portë pas 20 minutave lojë me Abazajn, ndërsa Lushnja përgjigjet me Gavën. Loja është e ekuilibruar, ndërsa vendësit kërkojnë më shumë të përfitojnë nga loja me topa të gjatë. Rasti më i pastër i kësaj pjese ka për protagonist sulmuesin Vasil Shkurtaj, i cili pas një asisti të Ramadanit, i vetëm me portierin Spaho, nuk arrin të shënojë duke mos u besuar syve.
PJESA E DYTË
Dedja largon Pepën duke aktivizuar Branicën e rikthyer nga dëmtimi. Nga ana tjetër, Hasan Lika u beson të njëjtëve lojtarë. Lushnja mundohet të bëj presion, por e ka të vështirë të rrezikojë portën bluzi. Ndërprerjet e lojës bëhen të mërzitshme, ndërsa për të pritur një tjetër rast ideal, duhen shumë minuta. Liçaj godet me kokë nga brenda zonës, por Spaho i thotë "jo" golit. Më pas
Lushnja merr frenat e lojës dhe fut në vështirësi gjirokastritët për afro 15 minuta. Alushi i afrohet golit me dy goditje nga jashtë zone, teksa Ruçi bën shpëtimtarin. Lika ndërhyn duke aktivizuar Mingën, Aurelion dhe të riun Ziaji,
që debuton në Superiore. Luftëtari zhbalancohet në kërkim të fitores dhe dominon në minutat e fundit, duke mbyllur Lushnjën në portë. Abazaj ka tri raste të pastra për gol, por sa për gabim në shënjestër, aq edhe për meritë të Spahos,
nuk arrin të shënojë. Katër minutat shtesë nuk sjellin ndryshime dhe gjithçka mbyllet në barazim pa gola. Javën e ardhshme Lushnja luan një "finale" me Vllazninë, sërish në "Roza Haxhiu", ndërsa Luftëtari udhëton në Durrës.