Vlonjatëve u mohohet 11-m, por ajo e Pollozhanit ishte
Ndeshja mes Kukësit dhe Flamurtarit ishte e tensionuar në disa momente dhe kulmoi në fund me penalltinë e akorduar për verilindorët. Ky 11- metërsh ishte momenti më i diskutueshëm i sfidës. Por, pavarësisht pretendimeve, prekja e topit me dorë nga Pollozhani është evidente dhe arbitri ka marrë vendimin e duhur për ta ndëshkuar ekipin vlonjat. Mbrojtësi Pollozhani nuk e ndalon topin me këmbë fillimisht, por ai përplaset në tokë dhe i shkon në dorë. Duket sikur dora është në pozicion natyral, por në fakt e ndihmon lojtarin e Flamurtarit për ta zotëruar topin dhe për ta larguar nga zona. Arbitri e ndëshkon lojtarin edhe me karton të verdhë. Por, për të mbërritur te penalltia, kishte edhe disa raste të tjera. Njëri prej tyre është pretendimi i vlonjatëve në fundin e pjesës së parë pas një kontakti në zonë mes Nedjelkoviçit dhe Musollit. Ky i fundit e shtyn me dorë dhe duhet të akordohej 11- metërsh. Në minutën e tetë, Kukësit i mohohet një faull në hyrje të zonës, kur Musta godet në këmbën e Gurit. Por, ky i fundit falet nga gjyqtari në minutën e 53- të, kur i ndërhyn me takë mesfushorit Sidibe. Elis Bakaj gjithashtu meritonte karton të verdhë, kur në minutën e 15- të godet topin me forcë jashtë fushës, pasi loja ishte ndërprerë nga kryesori për rivënie fundore. Bakaj kërkon falje dhe Hamitaj nuk e fut dorën në xhep. Nuk ndodh e njëjta gjë për Flamurtarin, pasi Siljanovski ndëshkohet që në start, ashtu si më vonë Musta, Sidibe dhe të gjithë me radhë. Ky i fundit merr 2 të verdhë për ndërhyrje nga pas në fundin e ndeshjes, por vendimi është i dyshimtë.