Fitore për ditëlindje, derbi është i Partizanit
Shkëlqen edhe braziliani Lukas, Plaku krenaria e vetme e Kamzës
Partizani i ka bërë vetes si dhuratë për 72-vjetorin e themelimit një fitore në shifrat 2-1, të cilën e arriti dje ndaj Kamzës në stadiumin "Selman Stërmasi". Pas dy disfatave të para të 2018ës me Flamurtarin, për kampionat dhe kupë, të kuqtë arritën dje që për ditëlindje të shënonin fitoren e parë për këtë vit, ku gjithçka u vendos nga dygolëshi i Jasir Asanit. Derbi më i ri i kryeqytetit mbylli edhe fazën e dytë të kampionatit të Kategorisë Superiore, ku falë trepikëshit të djeshëm, "demat" kanë parakaluar Kamzën në klasifikim dhe tani ndodhen në vendin e pestë me 27 pikë. Partizani ka pësuar ndryshime rrënjësore në merkaton e dimrit, bilanci i së cilës është: 14 largime dhe 9 afrime. Nga ajo që u pa dje, prurjet e dimrit duken më rezultative se ato të verës, pasi që në ndeshjen e parë si titullar, Lukas Kardozo tregoi se do t'u bëjë shumë punë të kuqve. Sinjale pozitive në debutim dha edhe 19-vjeçari, Esat Mala. Të ndodhur në gjysmë të rrugës, të kuqve u del shumë punë për të bërë, pasi pasiguria në mbrojtje mbetet, si dhe shpërdorojnë shumë në fazën përmbyllëse të aksioneve.
PJESA E PARË- Partizani vinte në këtë takim të javës së 18-të me disa risi në formacion, ku në mungesë të Kalarit, Trashi u pozicionua mbrojtës i majtë duke bërë një paraqitje pozitive. Lukas Kardozo e nisi si titullar dhe ndonëse nuk gëzon kondicionin e duhur, u tregua rezultativ. Takimi nisi me Prognin si "pykë", që më pas u alternua me Bardhin. Kamza ndryshimet i kishte në mbrojtje, ku edhe shfaqi problemet kryesore, ndërsa mungesa e Ymerajt ra në sy në derbi. Takimi nisi shumë mirë për të kuqtë, ku që në minutën e 6-të zhbllokojnë rezultatin me Asanin. Pas golit, "demat" janë më të qetë në lojë dhe me brazilianin Lukas në të majtë të sulmit kishin më shumë rrezikshmëri. Batha me Telushin fituan mesfushën dhe në minutën e 23të dyfishojnë rezultatin me Asanin, i cili e finalizon me sukses asistin e brazilianit Lukas. Por, Kamza nuk dorëzohet dhe dy minuta më pas i gjen në gjumë të kuqtë, ku Plaku tregoi vlerat e tij duke ngushtuar shifrat me anë të golit që shënoi me kokë në një pozicion disi të vështirë. Skuadra e drejtuar nga Klevis Dalipi arrin ta kalojë momentin dhe marrë frenat e lojës, ndërsa sulmi i Kamzës, ishte shumë i tërhequr duke mos përbërë problem. Në shifrat 2-1 për "demat" mbyllet pjesa e parë.
PJESA E DYTË- Të dy ekipet e rinisin ndeshjen me nga një zëvendësim. Për shkak të gjendjes gripale, Telushi ia la vendin të riut Esat Mala, i cili duhet vlerësuar për debutimin pozitiv që bëri dje. Gjithashtu, vjen edhe momenti i debutimit të Filit ndaj ish-skuadrës, ku
trajneri Ndreu e aktivizon në vend të Idrizajt. Edhe pjesa e dytë nis vrullshëm për të kuqtë. Në minutat 48 dhe 49 kanë dy mundësi shënimi, ku fillimisht Asani vonon, ndërsa në rastin e dytë gjuajtja e Trashit ndalet nga trau i portës. Në minutën e 57-të, Bardhi humbet
një tjetër rast "të artë" për të shënuar. Një minutë më pas, autori i dy golave, Jasir Asani, i dëmtuar, ia lë vendin Besart Abdurrahimit që debutoi në kampionat me Partizanin. Me këtë zëvendësim të kuqtë marrin direktiva tërheqje, pasi të kuqtë lëshojnë terren dhe Kamza nis dominimin territorial. Përpos dominimit të lehtë të kamzalinjëve në fushë, rastet më të pastra për shënim i patën sërish "demat". Në minutën e 60-të, Raçiç, disi në hije në këtë takim, i lë vendin Rezit dhe 10 minuta më pas Lelis ia lë vendim Mumajesit, i cili i jep gjallëri lojës së Kamzës nga e majta. Në minutën e 78-të, Lukas Kardozo, i jep mundësi serbit Milan Kulum që të debutojë me Partizanin. Përpos rasteve sporadike, i gjithë takimi u mbyll me fitoren e Partizanit, sukses që erdhi në ditën e 72-vjetorit të themelimit si klub.