Dalipi: Fitore në kohën e duhur, tani nuk ndalemi

Klevis Dalipi është i lumtur që, nën drejtimin e tij nga stoli, Partizani ka arritur fitore në një ditë të veçantë, që ka të bëjë me themelimin e klubit të kuq. Në intervistën për "SuperSport" pas ndeshjes, zv.trajneri theksoi se tani duhet fitore edhe ndaj Laçit.

Ishte ditëlindja e 72-të e Partizanit. A është dhuratë kjo fitore ndaj Kamzës?

Patjetër që festa bashkohet me këtë fitore. E dinim që ishte një ndeshje e vështirë. Gjatë 90 minutave ndodhën shumë episode. Ajo që na mungoi në Kupë, finalizimi, e patëm sot (dje). Edhe ndërrimi i Telushit na vuri pak në vështirësi.

Gjithsesi, mund dhe duhet të shënonit golin e tretë. Shpërdoruat jo pak...?

Edhe ndeshja me Kamzën ishte e vështirë sepse kundërshtari i rrezikoi të gjitha kartat dhe e la shpesh Bardhin të lirë, por ne nuk e shënuam dot golin e tretë. A krijohet një frymëmarrje për ekipin pas kësaj fitoreje? Patjetër, kjo fitore është me shumë vlera ndaj një rivali që e kishim 2 pikë para. Më shumë është për vazhdimësinë sepse kemi një ndeshje tjetër të vështirë me Laçin. Kjo fitore na jep moral. Loja nga krahët funksionoi, sidomos me kombinimet mes Lukasit dhe Asanit...

Goli i dytë erdhi si rrjedhojë e asaj që kishim stërvitur gjatë javës. E përsëris, duhet akoma kohë. Për Lukasin ishte ndeshja e parë, por me atë që dha sot, na jep shpresa që do jetë i vlefshëm në të ardhmen.

Kur do t'i mbyllni ndeshjet pa pësuar?

Për problemin e golit është e drejtë. Plakun e dinim që është një lojtar i rrezikshëm, por golat pësohen. Duhet të përmirësojmë faktin që të shënojmë më tepër. Nëse shënojmë, i japim qetësi skuadrës. Kur do jetë gati Çani?

Çani është në një trajtim dhe është në përmirësim e sipër. Nuk ka shfaqur shenja të dëmtimit të mëparshëm. Në ditët në vijim do marrë ngarkesën e plotë në stërvitje.