Tirana shënon sa për 4... skuadra
Ringjallja e sulmuesve, 24 gola vijnë nga 6 lojtarët që kanë marrë minuta në 14 javë
Tirana është e pathye shme. Bardheblutë javë pas jave po dëshmojnë se nuk kanë rival në këtë kategori. Ngjitja është vetëm çështje javësh dhe këtë e thonë.... statistikat. Ecuri më të mirë se kaq nuk mund të kishte, e megjithatë "pengu" i vetëm i të besuarve të Ze Marias mbetet ajo humbje me Bylisin në shtëpi dhe barazimi në transfertën e Shënkollit, pasi me 6 pikë më shumë, tashmë do të ishin shumë herë më të qetë. E, megjithatë, komoditeti nuk është se u mungon edhe tani, pasi pas 14 javësh kanë "blinduar" vendin e parë me 37 pikë pas 12 fitoreve dhe 1 barazimi. Por, më shumë se pikavarazhi, shpresë jep golavarazhi. Kanë pësuar 3 gola deri më tani, duke pasur kësisoj mbrojtjen më të mirë jo vetëm në këtë ligë, por edhe në Superiore. Por shumë herë më të frikshme i kanë shifrat në sulm, pasi tashmë "gangrena" disavjeçare duket se është hedhur pas krahëve. E kanë gjetur plot 38 herë portën kundërshtare dhe mesatarja është perfekte, sidomos kur e krahason me skuadrat e tjera që kanë në Grupin B. Të bësh një llogari të thjeshtë, rezulton se Tirana shënon sa për 4 skuadra bashkë. Por, po të shohësh tabelën, ekipet që renditen në zonën e ftohtë shënojnë sa vetë bardheblutë. Iliria, Shkumbini, Turbina dhe Naftëtari kanë realizuar
në total 39 gola, pra 1 më shumë se vetë kryeqytetasit. Diferencat janë realisht të mëdha, çka i bën 24 herë kampionët e vendit kandidatët kryesorë për t'u rikthyer në mesin e më të mirëve. Ndaj, kur kanë mbetur edhe 4 javë nga faza e dytë, Tirana synon që të
marrin maksimumin e mundshëm dhe të mbërrijnë në kuotën e 49 pikëve (pasi duan që kur të futet në lojë përgjysmimi i pikëve, të jenë me 25 pikë).
SULMUESIT
Ringjallja vjen nga sulmi. Vjet bardheblutë vuajtën aq
shumë për një lojtar që mund të shtynte topin në rrjetë. Por duket se këtë sezon këtij shqetësimi i kanë dhënë fund. Me Junus Sentamun dhe Majkëll Ngoonë, golat nuk janë më një problem. Të dy së bashku kanë realizuar 17 herë në portat kundërshtare, duke i dhënë shpeshherë pikë të vyera skuadrës. Por ajo që gëzon, është fakti që, edhe lojtarët e tjerë që janë përdorur nga Ze Maria në ofensivë, kanë dëshmuar se kanë "shënjestër". Greca, Halili, Bardhi dhe Qilimi kanë realizuar gjithashtu gola, duke bërë që e gjithë ofensiva të realizojë 24 gola nga 38 në total.