FIFA dhe UEFA garantojnë: Zgjedhjet do jenë demokratike
Mbërrijnë tre përfaqësues të qeverive të futbollit
Përfaqësues të lartë të FIFA-s dhe UEFA-s zbarkojnë në Shqipëri një ditë para zgjedhjeve për kreun e ri dhe organet e reja drejtuese të FSHF-së. FIFA ka dërguar për të monitoruar punimet e asamblesë vëzhguesin italian, Luka Nikola, ndërsa nga UEFA do të jenë të pranishëm në Durrës vetë zv.presidenti Grigori Surkis dhe Zoran Lakoviç, me detyrë drejtor i divizionit të federatave. Ky i fundit foli dje për "Top Channel" pas mbërritjes në Tiranë. "Unë dhe Surkis, zv.presidenti i UEFA-s, do të jemi këtu për të ndjekur Asamblenë e Përgjithshme që do të mbahet të mërkurën. Surkis ishte në Tiranë pak ditë më parë, vizitoi Federatën dhe takoi kryeministrin e vendit. Raportimi i tij ishte pozitiv për takimet. Ne mendojmë se zgjedhjet do të jenë demokratike dhe kjo është arsyeja që jemi këtu. Nuk jemi thjesht për të monitoruar procesin, por edhe fushatën elektorale që është shumë e rëndësishme të jetë konform parimeve të UEFA-s", deklaroi Lakoviç. Gjatë muajit të kaluar është përmendur jo pak rreziku i ndërhyrjes së politikës në zgjedhje duke iu referuar faktit se kandidati Bashkim Fino vjen si përfaqësues i lartë i partisë që drejton qeverinë. Ka qenë vetë presidenti Armand Duka, ai që në disa raste ka paralajmëruar këtë rrezik, madje duke akuzuar ministra dhe kryebashkiakë për presion ndaj anëtarëve. Mirëpo, pas ardhjes në Tiranë të zv. presidentit të UEFA-s, Surkis, gjithçka erdhi duke u zbehur, pavarësisht se palët nuk kanë qenë asnjëherë në union për këtë çështje.