Gazetarë, politikanë, juristë dhe sportistë, ja gara për Komitetin Ekzekutiv
Votohen 9 nga 11 vende, për herë të parë gazetari Ervin Baku
Gazetarë të mirënjohur me eksperiencë, deputetë, ish-kryetarë partie dhe deri tek ishprokurorë që kërkojnë një vend në Komitetin Ekzekutiv të FSHF-së. Në garë do të jetë edhe gazetari Ervin Baku, me eksperiencë dhe njohje në fushën e sportit dhe të rregullave apo edhe politikave që kanë të bëjnë me futbollin dhe jo vetëm. Në listën me 23 kandidatë do të votohen vetëm 9 vende të Komitetit Ekzekutiv. Bashkë me presidentin që do të zgjidhet dhe Kryetarin e Shoqatës së Arbitrave, Tahir Kastrati, numri i KE-së shkon 11. Në garë do të jetë deputeti i Partisë Demokratike, Enkelejd Alibeaj, i cili është propozuar nga klubi i Bylisit. Gjithashtu është në listë edhe ish-kryetari i Partisë Lëvizja e Legalitetit, Ekrem Spahia. Të dytët pas politikanëve apo njerëzve pranë partive në vend janë ata që vijnë nga bota e ekonomisë. Bëhet fjalë për biznesmenë të njohur dhe administratorë kompanish. Nga 9 anëtarët, që mbyllën mandatin e fundit, nuk do të rikandidojnë vetëm ish-futbollisti Muhedin Targaj dhe avokati Artan Hajdari. Ndërsa zv.presidentët Edvin Libohova dhe Lutfi Nuri do të kërkojnë një tjetër mandat. E njëjta gjë mund të thuhet edhe për Arben Devishajn, Abdyl Kuriun, Vasil Bicin, Bardhyl Jerën, si dhe Bardhyl Minxhozin. Për herë të parë kandidon edhe një femër, Aldona Sylaj, e cila në vitet e fundit ka qenë pjesë e komisioneve juridike të FSHF- së. Ajo është propozuar nga klubi i Tiranës dhe i Mamurrasit. Ndërsa ishkryeprokurori Theodhori Sollaku ka marrë bekimin e Partizanit. Gjithashtu, njerëz nga bota e sportit si Shkëlqim Muça, Artan Shytaj dhe Eduard Prodani do të kërkojnë të votohen në asamble për t'u bërë pjesë e komitetit ekzekutiv.