Qetësohen në Gjirokastër, Bregu kthehet në stërvitje

Luftëtari, nën drejtimin e trajnerit Hasan Lika, nga dje ka startuar punën për ndeshjen e parë të fazës së tretë, atë me Teutën. Një sfidë delikate për të dyja skuadrat, që do të përballen të shtunën në "Niko Dovana". Luftëtarit, në përballjen me Teutën, i kërkohet të hedhë pas "krahëve" dy humbjet që u kanë shkaktuar durrsakët në pjesën e parë të sezonit, por mbetet një mision i vështirë. 2-1 është mundur Luftëtari në "Niko Dovana" në kuadër të javës së parë dhe 2-3 në stadiumin "Gjirokastra" në takimin premierë të fazës së dytë. Përpos humbjeve "të arkivuara" me Teutën në dy fazat e para, gjirokastritët me trajnerin Lika, një "ish" i stolit durrsak janë të vendosur për të shfaqur cilësitë e tyre më të mira në Durrës. Me këtë objektiv, bluzinjtë dje kanë nisur përgatitjet antiTeutë, të gatshëm për një tjetër rezultat pozitiv, pas barazimit 0-0 të arritur në "Roza Haxhiu". Bashkimi me grupin i Dejvi Bregut është përjetuar pozitivisht te Luftëtari, ku nuk kanë munguar edhe përqafimet e lojtarëve me vlonjatin. Rikthimi i Bregut në stërvitje e ka elektrizuar atmosferën në kampin bluzi. Jo vetëm kaq, por dhe stërvitja me grupin e Oltion Rrapajt dhe Eri Lamçes është konsideruar lajm i mirë. Një numër i konsiderueshëm tifozësh gjirokastritë kanë qenë të pranishëm në seancën e djeshme stërvitore. Analiza - Trajneri Lika dhe ndihmësit e tij para nisjes së seancës stërvitore analizuan barazimin 0-0 me Lushnjën. "Mund dhe duhet të kishim marrë më shumë në Lushnjë, por ky është futbolli. Mundësitë na u dhanë. Nuk shënuam gol, por edhe mund të ndëshkoheshim në fund për mungesë përqendrimi. E rëndësishme është ecuria pozitive në kampionat. Për të qenë të suksesshëm në Durrës duhet të tregohemi të qetë para portës së kundërshtarit dhe, për më shumë, të jemi të kujdesshëm në lojën mbrojtëse". Ky është mesazhi që u ka përcjellë trajneri Lika të tijve para seancës së djeshme stërvitore. Luftëtari në ndeshjen e së shtunës pritet të jetë i kompletuar në organikë. Në dyshim është mbrojtësi Oltion Rrapa, ndërkohë që sulmuesi Eri Lamçja duket se e ka kaluar dëmtimin. Tomor Shehu