Tirana shpërfytyrohet në Bullgari
Bardheblutë turpërohen nga Levski, munden me 53 pikë diferencë dhe zvogëlohen shanset
Zhgënjen përsëri skuadra bardheblu në Ligën ballkanike duke pësuar një nga humbjet më të thella me një diferencë prej -53 pikësh. Skuadra e Tiranës në basketboll për meshkuj është shkatërruar dje në mbrëmje 105-52 nga skuadra e Levski Lukoil, ndeshje kjo e vlefshme për raundin e 12-të të Ligës ballkanike, e cila është zhvilluar në palestrën sportive universitare të Sofies (Bullgari). Ka qenë një nga paraqitjet më të dobëta të kampionëve tanë. Ndërsa bullgarët e Lukoilit, me amerikanin Konks që realizon 28 pikë, bënë një paraqitje të mirë si në gjuajtje edhe në organizim. Vendësit shënojnë dyfishin e pikëve të Tiranës duke e dominuar ndeshjen. Kjo ndoshta ka ardhur edhe nga lodhja e udhëtimit, por edhe nga ndeshjet e shpeshta në çdo dy ditë në aktivitetin e Kupës së Shqipërisë, ku kjo skuadër e ngriti trofeun fitues. Në përballjen e parë të luajtur në kryeqytet, skuadra e Lukoilit ishte mundur nga Ti- rana (79-76), ndaj pritej që të ishte një tjetër ndeshje e fortë mes këtyre dy ekipeve. Kjo ndeshje erdhi momentin më të mirë për bardheblutë, që sapo kishim triumfuar në Kupën së Shqipërisë, por nuk ndodhi kështu. Ishte një zhgënjim total. Të katër periodat ishin një dominim total i ekipit vendës, identike si në lojë dhe në rezultat me bardheblutë, që çdo në çdo periodë ishin të fiksuar te 13-pikëshi, e ndërsa bullgarët vërtiteshin në kuotën e 25-27 pikëve për çdo periodë. Ndoshta pika "13" ishte dhe tersi i ekipit bardheblu. Diferenca të mëdha, që konfirmuan se në fushë nuk kishte rivalitet, pasi vendësit ishin superiorë në çdo drejtim duke e kthyer sfidën në një stërvitore. Për Tiranën, kjo është humbja e 6-të radhazi në këtë aktivitet dhe e teta në total, ku ka arritur të marrin vetëm dy fitore. Kampionët e Shqipërisë do të luajnë pas 48 orësh sërish në Bullgari, këtë herë ndaj Rilski Sportist, skuadër të cilën e ka mundur në kryeqytet 78-75. Ndaj, në këtë sfidë duhet të vijë menjëherë reagimi dhe kthesa për kampionët e Shqipërisë nëse duan të synojnë një vend
në "play-off". Deri në fund të kësaj aventure ballkanike, ekipi bardheblu ka në dispozicion edhe 3 takime për ta mbyllur atë. Përfundimisht, me 2 fitore, 8 humbje, me një pikavarazh negativ 746-936 (-190), është një tjetër zhgënjim për skuadrën tonë. Tashmë, edhe pse është ngjitur një vend në renditje, duke qenë e 5-ta, pak shpresa mbeten për kualifikim.