Frenojnë Lacio, Inter dhe Roma, Milani nis misionin Champions
Në dy muaj rikuperon ndaj Interit, vendi i katërt 10 pikë larg
Tri skuadra në dy pikë dhe dy vende për tri pretendente, me garën për në biletë në Ligën e Kampioneve gjithnjë e më të ndezur. Lacio me 46 pikë, Interi 45 dhe Roma 44 po e bëjnë më interesante luftën për vendet e lëna pas Juventusit dhe Napolit. Për të kuptuar më mirë situatën, duhet të bëjmë një hap në javën e 15-të, kur treshja e sipërpërmendur mundnin respektivisht Xhenovën, Spalin dhe Kievon. Ndoshta ngricat kanë prekur të gjithë Italinë, por nuk është fort normale frenimi i ekipeve të vendeve ta para të Serisë A, sidomos nëse përqendrohemi të grupi që lufton për Champions. Me Juventusin dhe Napolin të paarritshme, ekipet pretendente për një biletë në Kupën me veshë të gjatë kanë hapur një luftë katërshe, ku lejohen vetëm dy fitimtarë. Në muajin e fundit, as Lacio dhe as Roma nuk kanë përfituar nga ngadalësimi i Interit, me Milanin e Gatuzos që ka arritur të "brejë" vetëm 10 pikë.
Frenimi i trefishtë - Nga 30 dhjetori, që përkon me javën e fundit të fazës së parë, Lacio dhe Roma kanë luajtur gjashtë ndeshje, ku përfshihet edhe nga një ndeshje e rikuperuar për secilën. Interi ka luajtur pesë takime duke mbledhur më vështirësi pesë pikë, fryt i pesë barazimeve, ndër të cilat një me Lacion (0-0) dhe një me Romën (1-1). Skuadra e Simone Inzagit ka realizuar 11 pikë, të cilat e kanë fillesën pikërisht me një barazim ndaj Interit. Tri fitore radhazi, të ndjekura nga dy humbje në seri kanë penguar bardhekaltrit të konsolidojnë renditjen e tyre. Në po kaq ndeshje (6), edhe Roma nuk ka bërë më mirë se të tjerët duke mbledhur gjithashtu nga një pikë për ndeshje.
Ndjekësit - Dhjetë, gjashtë dhe pesë: bilanci është shënuar ende me të kuqe dhe kjo u jep shpresë disa ekipeve që ndjekin. Më shumë se Sampdoria (8 pikë) apo Atalanta (9 pikë), nga trafiku i ngjeshur në renditje ka përfituar Milani, që sidomos pas Krishtlindjeve ka grumbulluar më shumë pikë se të gjithë, 11 për të qenë të saktë. Barazime në Firence dhe në Udine, në mes të së cilave tri fitore. Gatuzon dhe djemtë e tij matematika i mban ende në lojë, por distanca nga vendi i katër mbetet e madhe sepse dhjetë pikë nuk rikuperohen lehtë, por nëse frenimi i të tjerave vazhdon...