Erblira Bici, “çekiçi” kuqezi në finalen e Kupës së Italisë
Volejbollistja shqiptare feston me Mondovi
Volejbollistja kuqezi, 23-vjeçarja shqiptare, Erblira Bici ka bërë një ndeshje të jashtëzakonshme, duke shënuar plot 25 pikë për skuadrën italiane LPM Mondovi. Kjo fitore e skuadrës italiane, që konkurron në serinë A2 për kampionatin vendas, ka bërë që të jetë finaliste.
Të mërkurën në mbrëmje, volejbollistja ka arritur një tjetër kulm në karrierën e saj. Pas plot dy orësh e 3 minutash të ethshme, plot 105 pikë të realizuara nga skuadra e saj kundrejt 95 të skuadrës kundërshtare, Erblira Bici dhe skuadra e saj, LPM Mondovi, kanë shkruar historinë, duke mundur 3-2 në gjysmëfinale Fenera Kierin dhe duke siguruar vendin për në finalen e madhe të Kupës së Italisë për Serinë A2 në volejboll për femra. Megjithëse, përgjatë ditëve të fundit ka vuajtur nga një grip i fortë dhe merrte ilaçe, 23-vjeçarja shqiptare Bici ka bërë një ndeshje të jashtëzakonshme, duke shënuar plot 25 pikë (pra, duke i dhuruar LPM Mondovisë, e vetme, një set) nga 78 pikët që realizoi skuadra e saj (pasi 27 pikët e tjera erdhën nga gabimet e kundërshtareve) dhe duke e udhëhequr ekipin e saj drejt finales së madhe të 28 shkurtit, në Bolonjë. Megjithëse Kupa e Italisë në volejboll për femra ka dy versione, atë të Serisë A1 dhe atë të Serisë A2, prapëseprapë, dueli i LPM Mondovisë me Batisteli S.G. Marinjanon, do të zhvillohet në të njëjtën sallë, pak para finales së Kupës së Italisë për Serinë A1 dhe do të jetë pa dyshim një vitrinë e jashtëzakonshme për volejbollisten kuqezi. Edhe në kampionat, skuadra e saj ndan kreun e renditjes, pikërisht me Marinjanon dhe është në valle për të siguruar vendin midis më të mirave të volejbollit "axurr" të femrave, sezonin e ardhshëm dhe kjo pa pasur nevojën e "play-off"-it. Për Erblira Bici, ose e ashtuquajtura "çekiçi" kuqezi, transferimi në një nga kampionatet elitare të volejbollit në Europë ( në Itali), nuk ka qenë rastësi për volejbollisten e kombëtares shqiptare Erblira Bici. Në debutimin e saj me piemontezet e LPM Bam Mondovi në A2, Bici është kthyer në një idhull për skuadrën, por edhe tifozërinë vendëse. Që në start, ish-i i Barleti Volej ka fituar trofeun e "MVP"- së dhe këtë sezon është finaliste e Kupës së Italisë.