Partizani del blof, Kukësi akuzon: Kamza bleu Jorgjin
Kampionët thyhen në shtëpi dhe shpallin “non grata” arbitrin. Replikon presidenti Qarri: Turp i madh! I mundëm në fushë dhe hedhin baltë...
Partizani del blof edhe në startin e fazës së tretë, pasi dje të kuqtë shpërdoruan mundësinë që renditeshin në vendin e tretë për herë të parë në këtë sezon. Duke ditur humbjen e Kukësit, të kuqtë barazuan 0-0 në shtëpi ndaj Laçit, i cili i kishte mundur "demat" në dy duelet e para. Partizani, jo që nuk u ngjit i treti, por u parakalua edhe nga Kamza, duke zbritur në vendin e gjashtë me 28 pikë. Fusha e rënduar nuk mund të quhet justifikim për barazimin 0-0, pasi terreni ishte i njëjtë për të dy ekipet. Partizani i djeshëm prodhoi volum loje, por pa ide të qarta dhe me lojtarë, që nuk kanë nuhatjen e duhur për të finalizuar edhe kur janë vetëm për vetëm me portierin kundërshtar. Partizani i djeshëm tregoi se ka shumë probleme, kryesisht në fazën e ndërtimit të aksioneve, pasi shpeshherë shikohej një distancë "e frikshme" mes reparteve. Sulmi mbetet apatik, pasi nuk ka instinktin "vrasës" të aksionit, pasi rastet nuk munguan. Ndërrimet e djeshme më shumë e çekuilibruan skuadrën, pasi lojtarët ndërruan shpesh rolet, madje edhe në pozicione jonatyrale. Me barazimin në shtëpi ndaj Laçit, fitorja me Kamzën dhe loja e bukur mbeten thjesht një imazh.
PJESA E PARË- Partizani hyri në fushë thuajse me të njëjtin formacion që triumfoi ndaj Kamzës, ku ndryshimi i vetëm ishte Gojkoviç në vend të Atandës. Laçi ishte me grup të plotë dhe që në fillim u duk qartë se synim kryesor kishte që të mos pësonin. Të kuqtë u munduan ta nisin aty ku e lanë me Kamzën, por "demave" u mungoi vizioni i atij triumfi. Takimi nis me ritëm dhe që në fillim të dy ekipet krijojnë rastet e para. Të kuqtë e bazojnë rrezikshmërinë te goditjet standarde, duke besuar te shtatlartësia e Belicës dhe Gojkoviçit, të cilët në përgjithësi bënë një punë të mirë. Partizani ka një dominim të lehtë në mesfushë dhe në minutën e 29-të shënojnë me anë të Prognit pas "predhës" së Telushit, por goli anulohet për pozicion jashtë loje. Më pas, laçianët kanë një rast me Rexhinaldon, por edhe ky gabon në finalizim. Disa minuta më vonë, edhe Qaqi nuk gjen shënjestrën e duhur me kokë. Në minutën e 39-të, Lukas shërben bukur për Asanin, por
gjyqtari ndërpret aksion për pozicion jashtë loje.
PJESA E DYTË- Të dy ekipet hyjnë në fushë me nga një zëvendësim. Te Partizani, Lukas i lë vendin Kotobellit, ndërsa Kallaku hyn në vend të Kejvi Bardhit. Braziliani i të kuqve u tha se ishte me grip
dhe dalja e tij jashtë fushe solli një rreshtim të ri në fushë. Trashi kalon mesfushor i majtë, por deri në fund të ndeshjes e ka ndryshuar disa herë pozicionin. 10 minutat e para janë të qeta dhe ritmi është disi i ulët. Gjuajtja e Jurgen Bardhit në të 56-ën, e pritur
nga Selmani, zgjoi ekipet. Pas këtij rasti, Ibrahimi del nga fusha dhe në vend të tij hyn Ramadani. Me këtë zëvendësim, Progni pozicionohet mbrojtës i djathtë, Ramadani mesfushor i majtë dhe Trashi kalon në qendër. Në kuadrin e tri minutave, të kuqtë kanë disa mundësi, por Bardhi në minutën e 59-të, i vetëm me kapitenin e Laçit, nuk di të shënojë. Meritë në këtë rast ka
"gardiani" kurbinas, që mban të paprekur rrjetën e portës. Me Ramadanin në fushë, ekipi bëhet edhe më i zbehtë në lojë, pasi 26-vjeçari tregoi një nivel të ulët. Në minutën e 69-të Rexhinaldo humbet një mundësi të pastër për të kaluar Laçin në avantazh, por Hoxha i thotë "jo". Çorientimi i Partizanit u shtua pas hyrjes së Kulum në fushë, të cilin, ndonëse është mesfushor shkatërrues, stafi e
pozicionoi si pykë. Nëse deri para hyrjes së dymetroshit serb, ekipi luante me topa të lartë, por skuadra ndryshon kursin me topa të ulët, duke gabuar sërish, pasi nuk e shfrytëzuan fizikun e Kulum. Trajneri Mezani bëri edhe dy zëvendësime të tjera, ku në të 77-ën minutë Eskerda i lë vendin Shtubinës, kurse në shtesë Nika zëvendësohet nga Lulaj. Gjithçka mbyllet në barazim 0-0.