Milani i falet Kutrones, Hysaj trondit Strakoshën
Gatuzo përgatit i qetë Ludogoretsin, 12 pikë në pesë takimet e fundit për “Djallin”
Milani kalon lehtë sisht Spalin duke fituar në transfertë 4-0, në një ndeshje kyçe për klasifikimin ku kuqezinjtë, të paktën për 24 orë, do të shijojnë vendin e gjashtë. Tri pikë të detyrueshme për djemtë e Gatuzos që duhet të jepnin një sinjal vazhdimësie pas barazimit ndaj Udinezes, por edhe për të nisur në mënyrën më të mirë një tur force që do t'i shohë protagonistë të 11 ndeshjeve në 36 ditë. Kutrone me një dygolësh, Bilja dhe Borini ishin "xhelatët" e Spalit, në një pasdite ku Gatuzo mori përgjigjet e kërkuara nga ekipi i tij.
Rrufeja "Patrik" - Pa Kaliniç, nën kujdesin e mjekëve, formacioni titullar sheh Patrik Kutronen në sulm, ndërsa Spali i beson formacionit dhe emrave të zakonshëm me pozicionin e trajnerit gjithnjë e më shumë në diskutim. Nuk ka as kohë për ekipet që të studiohen sepse sulmuesi i Milanit tregon premisat e një pasditeje të zezë për vendësit. Suso kroson në zonë, Romanjoli zhytet me kokë, por Meret reagon bukur. Grushtimin e portierit e shfrytëzon Kutrone që shtyn në rrjetë topin. Spali mundohet të reagojë, sidomos në korsinë e djathtë, ku Laxari bën çfarë të dojë me Rodrigezin, i cili duket i përhumbur në modulin kuqezi. Antenuçi duhet të udhëheqë sulmin, por Bonuçi dhe Romanjoli e anulojnë për 90 minuta, me Salamon që, në dy raste nga goditje këndi, kërcënon portën e Donarumës. Portieri i Milanit kalon një pasdite pa shumë punë dhe në të vetmin rrezik ndihmohet nga shtylla, e cila ndal tentativën e Vivianit nga një goditje dënimi buzë zonës së rreptësisë. Në një 45-minutësh të parë pa shumë probleme, i vetmi lajm i keq është kartoni i verdhë i Kesit që do t'i kushtojë afrikanit ndeshjen e javës së ardhshme ndaj Sampdorias.
Kutrone 2 - Për të provuar reagimin, Sempliçi provon të hedhë në fushë Paloskin, një nga "ish"- ët e sfidës së bashku me Salamon dhe Borielon (nuk luajti për shkak dëmtimi). Tentativa e parë vjen nga këmbët e Antenuçit, ndërkohë që diferencën e bën një tjetër produkt i fidanishteve të "Djallit", me Patrik Kutronen që gjen golin e katërt në Serinë A dhe dopietën e parë me fanellën kuqezi. Përsëri Suso përhap panik në zonë dhe godet me Meret që nuk kontrollon si duhet dhe Kutronen që përfiton "alla" Inzagi duke shënuar me portën e boshatisur. Dita e mirë e Biljas kon-
firmohet kur argjentinasi, pasi vjedh një top përpara zonës së Spalit, godet në cepin e djathtë të portës së mbrojtur nga Meret. Entuziazmi dhe lirshmëria në lojë i jep mundësi edhe Borinit të futur në lojë në minutën e 84-t që të gjejë golin e "pokerit"
kuqezi, i asistuar nga një tjetër zëvendësues si Montolivo. Me dy minuta shtesë mbyllet takimi që, përveç tri pikëve, i dhuron Gatuzos qetësinë për ta përgatitur si duhet sfidën në transfertë në Ligën e Europës ndaj Ludogoretsit.