Kamza trondit Kukësin në shtëpi

Verilindorët shpërdorojnë dhe ndalen te shtylla, portieri Gjonikaj i pakalueshëm

Futbolli modern po bëhet gjithmonë e më i paparashikueshëm. Ndërkohë që në futbollin shqiptar, skuadra si Kamza nuk lejojnë asnjë shans parashikimi, ndërsa janë të tilla që ofrojnë surprizë në çdo stadium ku luhet Kategoria Superiore. Me një gol të shënuar me kokë nga Rezi, Kamza e Ramadan Ndreut del me tri pikë nga stadiumi "Zeqir Ymeri", duke mundur Kukësin vendas në sfidën e parë të fazës së tetë dhe duke e barazuar në renditje. Mbijetesa? Kamza tashmë është me pikë të barabarta me kampionët në fuqi në kuotën e 29 pikëve.

PJESA E PARË - Shameti me dorën e fashuar në allçi dhe Musolli i përshtatur si qendërmbrojtës, ishin njëra anë e medaljes në këtë takim, pasi në anën tjetër, trajneri Ndreu kish hedhur titullarë lojtarë si Fili dhe Malaj, të afruar në merkaton e dimrit. Ky i fundit la fushën e lojës për Rezin në minutën e 37-të të takimit. Në fraksionin e parë të lojës, Kukësi ishte futur me qëllim të qartë për të qenë agresiv dhe për të mos i lënë mundësi organizimi Kamzës. Që në start, loja nis me goditje nga këndi dhe një tjetër mundësi shënimi për vendasit. Një goditje e fuqishme nga jashtë zonës grushtohet nga Gjonikaj, por Kale fare pranë e dërgon jashtë kuadratit. Më tej, Bakaj dhe Ethemi do të shfaqen rrezikshëm në zonën e miqve. I pari, me një gjuajtje tokazi, e dërgon jashtë kuadratit dhe më tej gjuajtja e fuqishme e Ethemit një minutë më vonë, në të dhjetën, bën portierin e Kamzës që të fluturojë për të grushtuar sferën. Miqtë duken të pafuqishëm për të rrezikuar, teksa Fukui provon brenda zonës me një goditje të lehtë. Me kalimin e minutave, Kukësi shton presionin dhe tentativat për shënim, por Gjonikaj është i pakalueshëm.

PJESA E DYTË - Kukësi e nis rrezikshëm edhe këtë start, me Bakajn që kalibron shkëlqyer një goditje standarde, por Gjonikaj i jep të njëjtën përgjigje. Me kalimin e minutave, do të jetë edhe Guri që do të ketë një mundësi shënimi, por Kukësit i mungon finalizimi i duhur dhe shfrytëzimi i aksioneve që krijon. Nga ana tjetër, minutazhi i pushimit i kish shërbyer mjaftueshëm Kamzës, e cila në këtë fraksion loje u fut me më tepër besim dhe më shumë agresive. Të besuarit e Ndreut tentuan të fitojnë metra në këtë fraksion dhe ja dolën që të shfaqen më shumë në zonën e Kukësit. Për vendasit, largimi i kapitenit Shameti duket se solli një lloj pasigurie në prapavijë. Pikërisht, në qendër të mbrojtjes së Kukësit u krijua edhe goli i miqve. Një krosim i gjatë nga e djathta gjen Rezin

në qendër të zonës, i cili i fiton duelin ajror Zderiçit në qendër të zonës dhe goditja me kokë e çon sferën në fund të rrjetës. Kukësi shton presionin, por jo qartësinë. Kamza bëhet mur në mbrojtje me vendosje më se të kujdesshme dhe të dendur, ndërsa Bakaj & CO nuk ia dalin

që të gjejnë golin. Në momentin më të mirë, një goditje nga distanca e Kukësit, edhe pas devijimit, përplaset në shtyllë. Vendasit provojnë me çdo mënyrë, por mungesa e qartësisë nuk sjell asgjë. Nisja e fazës së tretë me fitore e bën Kamzën gjithmonë e me pozita më të sigurta

për mbijetesën dhe pse jo, edhe pretendente kryesore për zonën e Europës, nëse do të ruajë këtë ecuri. Për Kukësin, kjo humbje zbeh thuajse fare shanset për të ruajtur titullin kampion, ndërsa çdo pikë e lënë rrugës, do të vonojë edhe sigurimin e zonës së Europës…