Gjoka: Vuajmë presionin, por e prisja që ekipi do reagonte

Trajneri i Vllaznisë: Tifozët na kanë rënduar... psikologjikisht

Ernest Gjoka më në fund merr frymë lirisht. Fitorja në Lushnjë ka rikthyer optimizmin te Vllaznia, që tashmë e sheh veten një shkallë më lart në renditje. Në prononcimin për "Supersport" pas ndeshjes së djeshme, trajneri kuqeblu theksoi se skuadra ka qenë shumë e rënduar psikologjikisht. "Një moment shumë i vështirë për skuadrën, por kjo ndeshje tregoi me të vërtetë një ndryshim mentaliteti. Pas një presioni kaq të madh, ne arritëm të fitonim. Këto janë ndeshje shumë specifike me skuadra që vuajnë fundin e tabelës. Në çdo moment duhet të jemi shumë të kujdesshëm. Ndaj Lushnjës shfrytëzuam më mirë hapësirat dhe shënuam. Por, nuk kemi bërë asgjë akoma. Kemi shumë punë për të bërë", ka thënë fillimisht Gjoka për mediat pas ndeshjes. Ndërkohë, trajneri foli edhe për mikrofonin e "SuperSport".

Jeni i kënaqur me reagimin e ekipit?

E prisja dhe mendoj se ky do të jetë marshi që duhet. Kemi lojtarë me cilësi dhe në janar është shtuar cilësia. Por, kemi një presion të madh.

Çfarë u mungoi lojtarëve gjatë kësaj kohe?

Ne u munduam të mos humbnin përqendrimin dhe të mos pësonim gol, sepse goli na dëmton shumë psikologjikisht. Kjo fitore na jep frymë për të kaluar momentin e vështirë.

Sa ndikon tensioni në skuadër? Normal që ka tension jashtë dhe që vjen në ekip, sepse 80% e lojtarëve janë shkodranë. Starti ynë nuk ishte i mirë dhe futbolli është një sport shumë psikologjik.

Si e shpjegoni që fituat, edhe pse kishte presion?

Presioni ka ekzistuar, por pavarësisht se nuk kishim luftën me Kukësin dhe Korçën, pritej nga tifozët që Vllaznia të ndryshonte menjëherë, pse jo edhe të fitonte. Nuk na eci dhe kjo javë ka qenë vendimtare.

A ju mungon një lojtar i shpejtë? Kam qejf edhe unë që të kemi lojtarë të shpejtë, por duhet të përshtatemi me këta që kemi, të mbajmë topin dhe jo ta teprojmë.