Egnatia “ngec” në shtëpi, Besa merr një pikë kthese
Ndeshja e portierëve, evitojnë gola të sigurt
Egnatia-Besa mbyllet me shifrat e bardha. Duke qenë sfidë me synime të ndryshme, nuk mungoi as lufta sportive. Afërsia gjeografike midis dy qyteteve bëri që të mos mungonin tifozët e të dyja kampeve, që sfiduan motin me reshje. Loja nisi mirë për vendësit, të cilët përpiqen të befasojnë Besën me anë të Selimaj që në të 4-ën, por ndërhyrja e Mirakës është vendimtare. Pesë minuta më pas reagojnë kavajasit, por kombinimi mes Deliallisit e Onuh nuk finalizohet prej këtij të fundit. Egnatia mundohet me Milen dhe Selimajn në të 15-ën dhe 16ën, por pa rezultat. Takimi tashmë ka një tjetër panoramë, pas shumë gabimesh Besa do të rrezikojë me Diksonin në 17-ën, por tentativa e tij me kokë kontrollohet nga Haremi. Ky i fundit i thotë "jo" edhe golit të Mihanit, pas një goditjeje gati mjeshtërore nga këndi. Sulme dhe kundërsulmet nuk mungojnë për minuta me radhë, por portierët janë të pakalueshëm. Miqtë mund të kishin shkuar në limitin e kësaj pjese, por kur goditja me kokë e Onuh po shkonte drejt rrjetës, në çastin e fundit u pikas nga Bakiasi që e largon në kufijtë e vijës fatale. E dyta do të jetë "fotokopje" e së parës: me shumë raste, por pa gola. Kavajasit kërkojnë të dalin në sulm me forca të shumta, por Deliallisi shpërdoron në të 68-ën dhe në të 71-ën gjuajtja e Pashës bllokohet nga Haremi. Rasti i shumëpritur për rrogozhinasit do të vinte në të 73-ën kur Antoni shkarkon të djathtën, por topi "stampohet" në shtyllë. Kur duheshin edhe 20 minuta nga fundi, vendësit shfaqen më aktivë me Dostin që, me një roveshatë, e nis topin për në cepin e portës, por Miraka grushton. Portieri shmang edhe golin e Melanit. Stafi i Besës i shtangu të gjithë të pranishmit me aktivizimin e Oshafit, që u pa i freskët dhe është një pikë e fortë në sulm. Ky i fundit brenda dy minutave mund t'i kishte dërguar të tijtë në avantazh me dy raste të pastra për shënim. Në rastin e parë nuk ka panik, ndërsa në të dytin, kur kavajasit po bëheshin gati për festë, Haremi, edhe pse me vështirësi, bën të vetin topin në dy kohë. Edhe pse u dhanë 4 minuta shtesë, rezultati në "Hasan Zyla" mbeti i pandryshuar. A.Buzi