Barleti Volej i pamposhtur, Partizani mund Tiranën
Volej femra/ Të kuqtë fitojnë derbin kryeqytetas
Java e tetë e kampionatit të volejbollit për femra kishte rezervuar takimin më të rëndësishëm, atë të derbit të madh kryeqytetas ndërmjet Partizanit dhe Tiranës, i cili u zhvillua në shtëpinë e bardhebluve. Ndeshje u mbyll me fitoren 3-0 (25-17, 25-17,25-15). Përforcimet e merkatos së dimrit tek ekipi i të kuqve duket se kanë dhënë efektet e para te skuadra e trajnerit Roland Tarja, duke mposhtur rivalet bardheblu në ndeshjen e luajtur në "Fahrie Hoti". Në të tri setet ishte Partizani ai që komandoi lojën, ndërsa Tirana qe e pafuqishme për të rivalizuar, por pavarësisht kësaj humbjeje, ekipi bardheblu mbron vendin e dytë. Ndërsa Partizani i është afruar në renditje duke qenë larg vetëm. Tashmë pritet hapi tjetër fals për të kapërcyer skuadrën që drejtohet nga Adrian Gorenxa, por njëkohësisht edhe duke konfirmuar pretendimet për titullin kampion këtë sezon. Pas një ndeshjeje dramatike, që zgjati mbi 2 orë, skuadra e Teutës mundi 3-2 (12-25, 2519, 25-15, 17-25, 15-6), Vllazninë në Shkodër, një sfidë kjo, ku loja e skuadrave ishte me luhatje. Vendaset e nisin mirë ndeshjen, por shpejt durrsaket rikuperojnë dhe përmbysin shifrat, duke fituar dy setet e tjera dhe udhëheqin 21 me sete. Por Vllaznia nuk heq dorë, luan më mirë dhe fiton setin e katërt, duke rihapur takimin. Por seti final nuk ka histori, fitohet 156 nga Teuta, e cila merr dy pikë që e mbajnë në vendin e tretë. Barleti Volej, kryesues i kampionatit, arriti një fitore të lehtë ndaj Skënderbeut me shifrat 3-0 (25-16, 25-13, 25-18), ndeshje e dominuar nga skuadra kryeqytetase, që pati epërsi në fushë në të tri setet. Jo vetëm kaq, por ekipi i trajnerit Gurabardhi qëndron i pamposhtur në kampionat, duke korrur suksesin e tetë në po kaq javë të luajtura. Fitoren e parë sezonale korri skuadra e Lushnjës, që mundi 3-0 (25-18, 2517, 25-23) Korabin në Peshkopi, duke u hakmarrë për humbjen e fazës së parë. Një fitore me shumë vlera për ekipin myzeqar, që jo vetëm merr 3 pikë të arta, por edhe i largohet vendit të fundit, aty ku qëndron tashmë Korabi, që me këtë humbje rrezikon seriozisht rënien nga kategoria. Volejbollistet vendase rivalizuan vetëm në setin e tretë, shumë pak për të fituar, duke zhgënjyer fansat.
Kështu, pas javës së tetë, kryeson e vetme Barleti Volej me 24 pikë ose të ashtuquajtura pikë të plota, sepse çdo fitore e ka trepikëshe. Ndiqet nga dy ekipet veterane të kësaj loje, Tirana e Partizani që janë pranë njëra-tjetrës me një pikë diferencë. Për t'u theksuar është rokada në fundin e tabelës ku Lushnja ka zbritur poshtë vetes Korabin dhe ka hedhur një hap të sigurt drejt mbijetesës. Vllaznia, Skënderbeu e Teuta janë skuadrat e mesit të artë.
Senad Nikshiqi, Fatmir Zhuzhi, Abdulla Dushku