Batshuaji “salto” Mavrajt, Dortmundi ngjitet i treti

Borusia e Dortmundit kalon me sukses 2- 0 Hamburgun e Mavrajt në javën e 22- të të Bundesligës, falë të zakonshmit tashmë Batshuaji (49') dhe Gëces (92'), gola të cilat e ngjisin skuadrën Peter Shtëgerit në vend të tretë. Në vend të katërt ngjitet Frankfurti i Kovaçit që mposht 4-2 Këlnin. Bajern Leverkuseni e sheh veten në vend të 3-të pas hapit fals në shtëpi kundër Hertës së Berlinit: për kryeqytetasin shënuan Lazaro (43') dhe Kalu (58') në fitoren e parë për vitin 2018. Suksese të rëndësishme edhe për Hanoverin dhe Hofenhaimin.

DORTMUNDI - Një klasike e futbollit gjerman: Dortmundi nis me Batshuajin sulmues të vetëm dhe Pulisiçin dhe Shyrrlen që e mbështesin. Por lajmi i ditës është edhe rikthimi i Rojsit pas 8 muajsh i dëmtuar. Hamburgu zgjedh të mbulohet më mirë me mbrojtjen me 5 vetë: rikthehet Mavraj që luan ndeshjen e parë për trajnerin e ri Holerbah. Por rezistenca e miqve zgjati vetëm një pjesë sepse fraksioni i dytë nis menjëherë me golin e vendësve: goditja e Pulisiçit nga e djathta shndërrohet në një asist për Miçi Batshuajin dhe sulmuesi i huazuar nga Çelsi shënon një gol të kollajshëm, që e feston me salton e famshme "alla" Obamejang, duke premtuar se do ta zëvendësonte gabonezin e larguar drejt Arsenalit edhe në formën e festës. Pas një ore, rast i madh për golin e dytë, por fillimisht Shyrrle dhe më pas Batshuaji gabojnë shënjestrën. Hamburgu provon në fund, por verdhezinjtë nuk vuajnë, madje në shtesë Gëce shënon edhe golin, që vulos rezultatin pas një aksioni të frymëzuar nga i rikthyeri Shyrrle. Suksesi i dytë radhazi për djemtë e Shtëgerit që ngjiten të vetëm në vend të tretë.