Zëvendësimet çekuilibruan "demat" në fushë ndaj Laçit

Partizani ka dalë blof edhe në startin e fazës së tretë. Në këtë dështim ndikuan disa faktorë. Gjithçka nis me zbrazjen e stadiumit nga tifozët; terreni i rënduar, pasi u luajt 24 orë pas Tirana-Tomori; mungesa në stol e trajnerit Starova dhe përcjella me vonesë e udhëzimeve përmes telefonit; aktivizimi nga fillimi i Lukas, i cili, për shkak të gripit nuk ishte në kondicionin e duhur; shpërdorimi i rasteve të pastra për shënim. Përveç këtyre fakteve, ndikim direkt patën edhe zëvendësimet e kryera në pjesën e dytë, të cilat, në vend që t'i jepnin shtysë ekipit, e çekuilibruan skuadrën. Në pjesën e dytë shpeshherë shikohej një distancë e madhe mes reparteve. Pesë veta qëndrojnë shumë prapa, duke krijuar një distancë deri në 30 metra nga pjesa tjetër. Zëvendësimet që kreu Partizani: në minutën e 46të Kotobelli hyn në vend të Lukas. Në minutën e 57-të, Ibrahimi ia lë vendin Ramadanit dhe, në minutën e 77-të, Asani ndërrohet me Kulum.

Kotobelli - Lorenc Trashi e nisi si mbrojtës i majtë, rol, të cilin e ka kryer me sukses edhe më parë. Me hyrjen e Kotobellit, Trashi avancon në pjesën ofensive, në të majtë. Por pas 12 minutash, Trashit i ndryshohet sërish roli me hyrjen në fushë të Ramadanit. Ai zhvendoset në qendër, ku shpeshherë i duhej të bënte rolin e sulmuesit të dytë. Me kalimin në qendër, lojtari humbi efikasitetin, pasi doli nga krahu i tij i preferuar.

Ramadani- Emran Ramadani, i ardhur gjatë janarit, për të cilin u tha se është lojtar me tipare sulmuese dhe luan në çdo rol, ndaj Laçit nuk dha asgjë. Madje, hyrja e tij në fushë në vend të Ibrahimit sikur e çekuilibroi skuadrën, e cila humbi rrezikshmërinë dhe rrjedhshmërinë në lojë. Progni, nga sulmues, kalon mbrojtës i djathtë dhe Trashi zë vendin e tij pas Bardhit. Ramadani e nisi si sulmues në krah të majtë, por duke bërë disa gabime në zotërim dhe duke mos shërbyer si duhet zhvendoset në të djathtë me daljen jashtë të Asanit.

Kulum - Milan Kulum, 2 metra i gjatë, ka ardhur në janar te Partizani si mesfushor shkatërrues. Por ndaj Laçit ai hyri në fushë në vend të Asanit, ndërrim i cili e ndryshoi tërësisht rreshtimin në sulm. Në mungesë të një "pyke", Kulum nga mesfushor shkatërrues pozicionohet në majë të sulmit. Bardhi kalon në të majtë të sulmit, ndërsa Ramadani spostohet djathtas. Zëvendësimi i pakuptimtë nuk ka të bëjë vetëm me përshtatjen e rolit të serbit, por me ndryshimin e stilit të lojës. Nëse deri atëherë shpeshherë praktikohej topi i gjatë dhe i lartë në zonën laçiane, pas hyrjes së Kulum kjo gjë u përdor rrallë. Partizani i pjesës së dytë rezultoi një eksperiment i dështuar, kjo falë zëvendësimeve, që më shumë u duken të komanduara sesa logjikë loje.