Duro: Frikë kam vetëm burgun, nuk më interesojnë synimet e Partizanit

Trajneri i Flamurtarit flet për Kupën dhe dënimin e mundshëm

Shpëtim Duro kërkon fitoren dhe kualifikimin sot në Tiranë. Në konferencën e djeshme për shtyp, trajneri Duro tha se u jep avantazh fitorja në Vlorë, por çdo gjë është e hapur. "E kemi thënë që sezoni i ri ka filluar me përballje të vështira për ne, por deri tani, me përjashtim të ndeshjes me Skënderbeun, edhe kjo ndeshje është e rëndësishme, pasi është ndeshja e dytë e Kupës së Shqipërisë me Partizanin. Patjetër që kjo është ndeshje e rëndësishme. Ne kemi një avantazh sepse është vetë specifika e Kupës që, kur t'i shënon një gol dhe kundërshtari nuk realizon, të jep avantazhin. Ne luajmë për një gol në Tiranë dhe ngarkesa është te kundërshtari, ashtu sikundër ishte në ndeshjen e parë te ne. Avantazhi ynë është si rezultat, por asgjë s'është e mbyllur, mbetet e hapur. Ne duhet ta vlerësojmë Partizanin makisimalisht për të arritur kualifikimin", tha fillimisht Duro. SITUATA- "Ne shikojmë punën tonë nuk na interesojnë llogaritë e kundërshtarit, nëse ai ka objektiv të vetëm Kupën. Do të bëjmë punën tonë për të dalë me fitore nga ky takim. Ne kemi një skuadër shumë konkurruese. Ndeshjet kanë qenë shumë të forta dhe, në një periudhë shumë të shkurtër, ne jemi ndeshur me kundërshtar të fortë. Kemi një skuadër të ekuilibruar dhe nuk bëjmë shumë ndryshime. Një ose dy ndryshime janë për të forcuar konkurrencën në skuadër. Ne kemi luajtur në këto ndeshje me më të fortët e kampionatit shqiptar. Humbën me Skënderbeun, por ishte një ndeshje që luajtëm të barabartë. Kemi objektivat tanë edhe në Kupë edhe në kampionat", tha Duro. GJYKIMI- Shpëtim Duro thotë se ka frikë vetëm nga burgu dhe nga asnjë dënim tjetër që mund t'i jepet pas deklaratave kundër gjyqtarëve. "Unë ato fjalë që kam thënë për ata arbitra asnjëherë nuk do t'i tërheq, pasi nuk është problemi i gjykimit në Kukës, por është gjyqtari. Për sa kohë që jam këtu trajner, ai gjykon ndeshjet tona. Me Skënderbeun pashë një gjykim profesional nga Andi Koçi dhe grupi i tij. Mund të ketë pasur ndonjë gabim në gjykim për Flamurtarin apo Skënderbeun, por kanë qenë njerëzore. Gjykimi në atë ndeshje ka qenë në nivel të lartë. Kur një arbitër krijon incident në Vlorë, vjen në Kukës. Ata që i caktojnë këta, nuk i marrin parasysh ato situata? Kjo gjë nuk më pëlqen. Nuk kam frikë nga asnjë dënim. Frikë kam vetëm nga burgu. Vetëm të mos më dënojnë, pa vendimet e tjera nuk më trembin sepse i caktojnë ata që caktojnë arbitrat", përfundon Duro. E.Sika