Koliçi: Nuk duhet të pësojmë, koha e kthesës
“Ndeshjet në shtëpi një makth, të evitojmë penalltitë”
Kukësi po kalon një sezon me luhatje të mëdha, e megjithatë sot kanë shansin që të hedhin një hap drejt kthesës së madhe. I këtij mendimi është edhe Enea Koliçi, i cili mendon se barazimi 1-1 në kryeqytet i favorizon ndjeshëm. Por, përtej besimit, portieri shprehet i çoroditur nga gabimet e shumta që po bën skuadra, sidomos në "Zeqir Ymeri". Në një intervistë për sajtin e klubit, gardiani thekson se humbjet e pësuara nuk kanë kurrfarë justifikimi, andaj paralajmëron kampionët duhet të rikthehen sa më shpejt, pasi koha nuk premton më. Kalimi i Tiranës është detyrim për Kukësin, prandaj gardiani kërkon fitoren në shtëpi. Edhe pse janë përgatitur edhe për penalltitë, shtatlarti preferon që skuadra ta zgjidhë gjithçka brenda 90 minutave kualifikimin. Kjo ndoshta do të ishte edhe dhurata më e bukur për pogradecarin, i cili dje ka festuar 32-vjetorin e lindjes.
Pas barazimit në kryeqytet, kualifikimi do të vendoset në Kukës. Si e
parashikon Koliçi këtë duel?
Tirana është një nga ekipet më të mira në Shqipëri, pavarësisht se këtë sezon luan në Kategorinë e Parë. Është ndeshje mjaft e vështirë në fakt. Por, të them të drejtën, rezultati 1 me 1 në kryeqytet na favorizon ne. Ndaj do të përpiqemi të mos pësojmë në këtë takim.
Mendoni se do ta zgjidhni brenda 90 minutave, pasi trajneri praktikoi në stërvitje edhe gjuajtjet e penalltive?
Shpresojmë ta zgjidhim brenda 90 minutave, të mos shkojmë në shtesë apo penallti, por jemi gjithsesi të përgatitur edhe për këto.
Keni pasur shumë oshilacione këtë sezon, sidomos në
shtëpi, ku si kurrë më parë keni pësuar 5 humbje. Çfarë po ndodh me Kukësin?
Të them të drejtën, këto ndeshje në Kukës kanë qenë një makth i vërtetë për ne. Po mundohem të gjej një justifikim, se përse nuk po bëjmë dot paraqitjet e duhura në shtëpi, por nuk e gjej dot.
A është ky momenti i kthesës së madhe në Kukës?
Shpresojmë që kjo situatë të ndryshojë, sepse nuk kemi më kohë.
Ditëlindja e 32-të ju gjen në Kukës dhe në një kohë me dëborë...
E vërtetë. Shpresoj që në darkë (në mbrëmje) të bëjmë një festë të bukur e të ngrohtë me shokët e ekipit, sepse në Kukës qenka realisht shumë ftohtë sot (dje).