Stërvitja në borë, trajneri fjalim ekipit

Skënderbeu dje ka mbyllur përgatitjet anti-Teutë me një seancë të fundit stërvitore, e cila, sipas asaj që është parë në fushë, ka qenë krejtësisht taktike. Në fakt, në orën 11:00, plot 30 minuta përpara startit të stërvitjes së fundit trajneri Ilir Daja ka qenë përpara gazetarëve duke folur gjerë e gjatë për këtë ndeshje të sotme ndaj durrsakëve. Përpara stërvitjes, Daja ka zhvilluar edhe një analizë të shkurtër me lojtarët, ku u ka kujtuar edhe njëherë se, pavarësisht fitores të para dy javësh 2-0 në Durrës, asgjë nuk ka përfunduar, teksa ka edhe 90 minuta të tjera që, më pas, të japin verdiktin final për të kaluar në turin gjysmëfinal të këtij eventi. Më pas, Daja, për më shumë se një orë, ka punuar vetëm me skema loje dhe ka zhvilluar në fund edhe një minindeshje. Duhet theksuar se grupi i lojtarëve, pavarësisht se, gjatë seancës kishte edhe reshje të vogla bore, ka qenë i preokupuar maksimalisht dhe kjo e ka kënaqur më shumë njëshin e stolit bardhekuq. Për sa u përket mungesave, tashmë dihen që Nimaga, Osmani dhe Taku nuk janë në dispozicion.