Kashami: Jemi të pastër, të hetohet ndeshja
"Nëse vërtetohet diçka, le të merren masa shembullore"
Apolonia nuk e ka pritur mirë faktin se një tjetër ndeshje e saj, këtë herë kur ajo fiton, gjykohet si e dyshimtë. Kjo është e dyta pas asaj me Tomorin, ku fierakët kanë pësuar tre gola në katër minuta, kurse me Turbinën kanë shënuar 4 gola në 10 minuta. Në një reagim për "Panorama Sport", trajneri i fierakëve, Ndriçim Kashami, shpreh hapur mërzinë e tij, duke u shprehur: "Është groteske dhe e dhimbshme, tallje me futbollin e ndershëm të një skuadre që luan me djersë e sakrificë, madje dhe kundër padrejtësive që jo rrallë i janë bërë gjatë këtij sezoni. Pësimi i golit të dytë e goditi kundërshtarin dhe ne e rritëm lojën tonë ndjeshëm. Çfarë ka këtu për të dyshuar? Pse nuk na paragjykuan për fitoren ndaj Bylisit kur shënuam 4 gola me Naftëtarin, kur kemi fituar 3 herë në transfertë dhe me meritë?", ka thënë Kashami, i cili kërkon më shumë respekt për lojtarët e rinj. Ndeshja në fjalë është paragjykuar që në fillim të saj, pas shtyrjes për ditën e hënë,
ndërkohë që ishte parashikuar të luhej të shtunën. "Ka qenë një gjendje gripale që na ka rënduar disa futbollistë të formacionit bazë dhe nuk mund të luanim të shtunën. Nuk jemi ne të parët, madje është hera e parë që e bëjmë", ka vazhduar Kashami.
BINDJA - Trajneri është i bindur se skuadra e tij nuk është e përfshirë në asnjë skemë të dyshimtë në ndeshjen ndaj Turbinës, pavarësisht gjithçkaje. "As ne e as Turbinës nuk ka interesonte gjë tjetër veç pikëve. Kanë dyshime? Le të hetojnë, të verifikojnë, të zbardhin të vërtetën e të merren masa shembullore nëse kjo që dyshohet është e vërtetë. Bindja ime është që ne absolutisht nuk jemi përfshirë dhe do të uroja me sinqeritet që të gjitha ekipet të luanin aq ndershëm sa Apolonia!", ka përfunduar drejtuesi i stolit të Apolonisë.