Trepikësh me detyrim, Besëlidhja drejt misionit të pamundur
Këtë fundjavë lezhjanët përballen me kryesuesit
Lezhjanët kanë zhvilluar seancën e djeshme stërvitore në kalçeto për shkak të reshjeve të shiut. Java e ardhshme rezervon një tjetër sfidë të vështirë për skuadrën e drejtuar nga Gledis Lani, pasi përballë do të kenë Kastriotin kryesues. Portieri shkodran, Samet Bajri, i cili ka marrë vendin e titullarit, në një prononcim për "Panorama Sport" është shprehur: "Duke e lënë pas atë çka ka kaluar, tani i gjithë përqendrimi është te përballja ndaj Kastriotit që do ta luajmë në fundjavë në Lezhë, një sfidë që ka peshë dhe përgjegjësi për ne, pasi është edhe kufiri ku ndahet mbijetesa në pesëshen e parë që na duhet ta sigurojmë. Ditët që kemi në dispozicion po i shfrytëzojmë maksimalisht për të marrë motivimin maksimal brenda kapaciteteve tona për të qenë sa më në formë përballë Kastriotit kryesues, pasi jemi të vendosur për t'ua kthyer buzëqeshjen lezhjanëve. Ndonëse përballë kemi Kastriotin kryesues, për Besëlidhjen që di të rikuperojë dhe të bëjë autokritikë reale në teren nuk është ndonjë problem i pakalueshëm dhe për këtë jam optimist", ka thënë Bajri. Forma e lojtarëve në prag të kësaj ndeshjeje paraqitet pozitive dhe ata kanë premtuar se do të bëjnë më të mirën e tyre në një takim ku trepikëshi është me detyrim. Preng Gjikola