Benzema luan shansin e fundit
Naço zëvendëson Karvahalin, “duel” Diarra-Lo Selso
Zinedin Zidan do t'ia besojë ndeshjen e sotme 11-shes klasike me BBC-në në sulm, e cila nxjerr jashtë loje mesfushorin Isko. Trajneri i Realit do t'i japë sërish besim sulmuesit Benzema, i cili ka shansin e fundit për të bindur tifozët dhe drejtuesit madrilenë. Ndryshe nga ndeshja e fundit, ku provoi vetëm Krosin dhe Modriçin përpara mbrojtjes, këtë herë duket se Kasemiro është i pazëvendësueshëm duke formuar treshen e mesfushës me dy të mësipërmit. Mungesa e vetme e Realit në këtë ndeshje është Karvahal, i cili është pezulluar dhe do të zëvendësohet nga Naço, që ka një duel të vështirë me Nejmarin. Nga ana tjetër, Unai Emeri ka vetëm një dilemë në repartin e mesfushës, pasi në sulm Kavani është rikthyer i gatshëm dhe bashkë me Nejmarin e Mbapenë do të provojnë të thyejnë mbrojtjen madrilene. Di Maria është në pikëpyetje, por mund të aktivizohet në mesfushë. Megjithatë, mediat shkruajnë se argjentinasi do të jetë "asi nën mëngë" për pjesën e dytë. Tiago Mota është lënë jashtë për këtë ndeshje, ndërsa Lasana Diarra dhe i riu Lo Selso janë në balotazh me njëritjetrin. Pjesa tjetër e mesfushës përbëhet nga Verrati dhe Rabio, ndërsa mbrojtja me Alveshin, Markuinjosin, Tiago Silvën dhe Kurzavën që qëndrojnë përpara Areolës.