Mezani nuk kënaqet kurrë: Na buzëqeshi fati për fitoren

I kënaqur me rezultatin dhe kualifikimin, por aspak me preokupimin e të tijve në ndeshjen e kthimit. Trajneri Gentjan Mezani është shprehur jo pak kritik për futbollistët e tij në deklaratën e dhënë për "Gol pas Goli', teksa tha se Laçit i buzëqeshi fati në Gjirokastër. "Së pari, i gëzohemi kësaj ndeshjeje dhe që kalojmë në gjysmëfinale. Të gjitha rivalet në gjysmëfinale do të jenë të forta dhe ekipe të mira, ndaj asgjë nuk ka mbaruar për të thënë jemi pretendent", tha Mezani.

LUFTËTARI - "E kisha menduar që do të ishte ndeshje e vështirë. Edhe pse fituam, rezultoi e tillë. Mund të rrezikonim nëse do të pësonim gol në pjesën e parë. Do t'u tërheq përsëri vërejtje lojtarëve të mi, siç bëra gjatë pushimit të takimit, pasi e menduan të lehtë. Mund të ndryshonim ndonjë gjë nëse do e zgjidhnim më shpejt, ndaj fakti që luajtën të gjithë, do të na e bëjë më të vështirë në fundjavë ndaj Luftëtarit për kampionat". MOTIVIMI - "Rezultati në shtëpi na dha siguri. Megjithatë, duhet të ishim të motivuar duke qenë se nuk kishte mbaruar asgjë. Në pjesën e dytë, Luftëtari futi lojtarë shumë të mirë që bëjnë diferencën. Fati na buzëqeshi, fituam këtë ndeshje dhe vijojmë më tej në Kupë". PREFERONI SKËNDERBEUN? - "Nuk mendoj aspak se kush do të jetë. Si Skënderbeu apo kushdo që të jetë, duhet të jemi jashtëzakonisht të përqendruar. Janë ekipe që të vënë në vështirësi dhe shumë të mira. Nuk mendoj që Skënderbeu do të tolerojë në gjysmëfinale apo finale. Dua përqendrim maksimal për secilin ekip që do të kemi përballë". TITULLARËT - "Formacionin e Luftëtarit e mësova kur erdhëm në Gjirokastër dhe nuk mund të prishja ekuilibrat e skuadrës sime për të bërë ndryshime. Kjo bëri që edhe vetë sportistët të kishin një tolerim, i cili mund të rezultonte negativ. Nëse do ta zgjidhnim në pjesën e parë, do të liroja diçka në të dytën për tre lojtarë formacioni. Më pas, kartoni i kuq na i vështirësoi gjërat për të bërë ndërrimet e duhura", është shprehur Mezani.