Guri kualifikon Kukësin, Tirana “ngec” në shtyllë
Bardheblutë “zgjohen” në të dytën, por kaq nuk mjafton
Kualifikohet Kukësi. "Heroi" i verilin dorëve mban të njëjtin emër si në ndeshjen e parë, atë të Sindri Gurit. Goli i shkodranit që në të 4-ën minutë u ka mjaftuar të besuarve të Pakultit që të eliminojnë Tiranën dhe shkojnë në gjysmëfinale me rezultatin final 2-1. Bardheblutë dalin kështu nga gara dhe rrjedhimisht u shuhen shpresat për të qenë pjesë e Ligës së Europës, ndaj tashmë e gjithë vëmendja do të përqendrohet te misioni "Superiore". Bora u bëri "dëm" miqve, por jo vendësve. Kukësi më në fund u kthye duke marrë një fitore të vyer pas asaj humbjeje të pësuar në kampionat.
PJESA E PARË - Të dyja ekipet e nisën me mungesa ndeshjen, megjithatë këtë herë Peter Pakult kishte marrë mirë masat duke "bllokuar" gjigantin Ngoo dhe krejt manovrën sulmuese të Tiranës. Loja nisi me vrull dhe, në të 4- ën, vendësit fitojnë një goditje dënimi që sjell edhe zhbllokimin e shifrave. E merr përsipër ekzekutimin ish- i Bakaj, i cili shërben për Gurin, që, pasi i shpëton mbulimit të të riut Cake, gjuan me kokë dhe 1-0. Bardheblutë shokohen, ndërkohë që verilindorët fitojnë më shumë siguri. Në të 14-ën, Kale i rrëmben kohën Hoxhallarit dhe depërton bukur në zonë nga e djathta, por në fund has në rezistencën e portierit të Tiranës. Guri ka shansin që të shënojë sërish me kokë, por nuk ka "shënjestër". Bardheblutë duket sikur nuk marrin frymë, madje, në çdo tentativë, hasen në rezistencën e "bilbilit". Kryeqytetasit mund të kishin pësuar më shumë, megjithatë pritjet e Likës ishin një mrekulli. Në të 29-ën i mohoi golin Bakajt pas një goditje dënimi në kufijtë e zonës, ndërsa 9 minuta më vonë "shtangu" stadiumin, kur në fraksion sekondi bëri dy superndërhyrje ndaj Dzarias dhe Kalesë. Edhe Rrumbullaku mund ta kishte ndëshkuar në fundin e kësaj pjese, por 37-vjeçari i portës është i pakalueshëm.
PJESA E DYTË - Ze Maria nxjerr Mugunën gati inekzistent në fushë dhe fut Çelhakën. Dhe, pushimi i bëri mirë Ti-
ranës, por jo deri në atë pikë sa të gjejë golin. Skuadra u "zgjua" në lojë dhe vuri realisht në rrezik vendësit. Kështu ngjau në të 49-ën, kur një goditje dënimi e Karabecit ndalet te këmbët e Sentamusë, që me shumë klas gjuan brenda zonës, por reagimi i Frashërit
është i shpejtë dhe shpëton Kukësin. Bardheblutë nuk pranojnë humbjen dhe vihen në kërkim të barazimit, rezultat që të paktën do i mundësonte shtesën. Në të 68-ën, Ngoo jep një asist perfekt për Grecën, që ndodhej në pozicion ideal, por sulmuesi bën më të vështirën
dhe e dërgon topin larg portës. Tirana merr kontrollonin e mesfushës, megjithatë nuk çan dot në zonën mike, madje duhet të kalonte e 80-ta që të riktheheshin rastet. Çelhaka hedh një top në zonë për Grecën, por gjuajtja e tij me kokë përfundon jashtë. Tre
minuta më vonë, Bakaj gjuan nga goditja e dënimit, por has rezistencën e Likës, topi shkon tek i sapofuturi Balde, i cili shumë pranë vijës fatale nuk e shtyn dot. Kur po mbyllet koha e rregullt, Tirana është e pafat. Këndorja e ekzekutuar nga Karabeci gjen Ngoonë
dhe gjuajtja me kokë e anglezit përplaset në shtyllën e majtë të portierit Frashëri. Kukësi merr frymë lirshëm, ndërsa 3 minutat shtesë nuk sjellin kurrfarë shprese për fituesit në fuqi të Kupës së Shqipërisë, të cilët këtë vit eliminohen që në çerekfinale.