Skënderbeu, kualifikim i hidhur kundër Teutës
Mbrojtësi dëmton gjurin, sulmuesi Soue rikthehet me dopietë
Skënderbeu likuidon Teutën dhe kalon në turin gjysmëfinal të Kupës së Shqipërisë. Në një stadium të boshatisur si kurrë më parë, korçarët fituan 3-0 duke mos vënë për asnjë moment në diskutim kalimin e turit. Pas triumfit në takimin e parë në Durrës me shifrat 0- 2, gjithçka ishte thjeshtësuar për bardhekuqtë. Mirëpo, trajneri Ilir Daja habiti jo pak duke hedhur në fushë thuajse të gjithë titullarët, me përjashtim të Orges Shehit, Kristi Vangjelit dhe Tefik Osmanit. Fitorja bindëse pati brenda një lajm të keq, pasi mbrojtësi Bajram Jashanica u dëmtua rëndë në gju dhe, sipas të dhënave paraprake, ai do të jetë jashtë fushave për të paktën një muaj. Nga ana tjetër, rikthimi te goli i Ali Souesë është një lajm i mirë për sulmuesin dhe vetë skuadrën, pasi kishte dy muaj që nuk gjente rrugën e rrjetës.
PJESA E PARË
Skënderbeu rreshtohet me skemën 4-3-3, teksa në formacion ishte rikthyer Emiljano Vila, ndërsa në portë luante Aldo Teqja. Teuta u kishte besuar thuajse të njëjtëve lojtarë që luajtën në kampionat ndaj Luftëtarit. Në pankinën durrsake debutonte Gentjan Begeja, i cili këtë takim e shfrytëzoi si test në prag të ndeshjes kundër Vllaznisë për kampionat. Në fillimin e lojës është Teuta që mund të kishte shënuar me Latif Amadu pas një gabimi të portierit Teqja. Skënderbeu qarkullon mirë topin dhe arrin të krijojë raste të njëpasnjëshme, por që nuk konkretizohen në gol. Soue, Xhejms dhe Gavazaj shpërdorojnë jo pak, ndërsa Vila godet shtyllën pas një goditjeje nga jashtë zone. Moçka bën heroin me dy pritje pas tentativave të Xhejmsit dhe Gavazajt, por kur mendohej se pjesa e parë u mbyll 0-0, një "predhë" e Sabjen Lilajt nga jashtë zone e dërgoi Skënderbeu në avantazh në dhomat e zhveshjes. PJESA E DYTË
Teuta e nis me dy zëvendësime të menjëhershme, teksa në portë futet Kastrati, ndërsa ka vend edhe për mbrojtësit Beqja e Shkalla. Skënderbeu luan lirshëm dhe rrezikon që në startin e së dytës, derisa një asist i Xhejmsit në minutën e 60-të kthehet në gol nga Soue. Mbrojtja e Teutës është e shpërfytyruar duke lënë hapësira të shumta. Daja hedh në fushë Sahitin dhe Jashanicën,
teksa ky i fundit bëhet protagonist i asistit të golit të tretë që ka për protagonist sërish Souenë. Në lojë futet edhe Gripshi, i cili shpërdoron dy raste flagrante. Nga ana tjetër, Hila dhe Lajthija bëjnë të njëjtën gjë. Gjithçka mbyllet me fitoren e pastër të Skënderbeut, 3-0.