Besëlidhja kërcënon Kastriotin
Besëlidhja, nën drejtimin e trajnerit Gledis Lani, vijon stërvitjen në kuadër të javës së 16-të të kampionatit të Kategorisë Parë, ku pret në shtëpi Kastriotin kryesues të grupit A. Pozicioni që mban momentalisht në renditje Besëlidhjen e impenjon maksimalisht për të luftuar për fitoren e radhës në shtëpi, çka do ta mbante jo vetëm matematikisht, por edhe realisht në 5-shen e parë të grupit. Guineasi Isak Kamara që pjesën e dytë të sezonit është vendosur në të djathë të mbrojtjes, në një prononcim për gazetën "Panorama Sport" u shpreh: "Humbja që pësuam në Shkodër përballë Vllaznisë B ishte më shumë nga gabimet e çastit se sa nga performanca e lojës në gjithë tërësinë e saj. Gjithsesi, humbja duhet lexuar si e tillë, pavarësisht rrethanave apo mënyra se si vjen. Autokritika më e mira e mundshme për ne praktikisht do të jetë fitorja ndaj Kastriotit të shtunën në Lezhë para tifozërisë sonë që i përshëndes dhe i ftoj që të na ndjekin, pasi nuk do t'i zhgënjejmë. Duke parë performancën tonë në këto tri ditë stërvitore dhe dy ditët që kemi në dispozicion deri në ditën e ndeshjes, kjo për të meremetuar ato të meta dhe dobësi që janë vërejtur deri tani, duhet që ta fitojmë sfidën me Kastriotin. Tri ndeshjet e mbetura të fazës së dytë duhet që t'i vlerësojmë maksimalisht pasi jemi të dënuar që t'i marrim pikët maksimale, ndryshe do të na trondiste seriozisht jo vetëm objektivi për ngjitje, por edhe 5shja e parë që na lejon vijimin e luftës për atje", u shpreh në prononcimin guineasi Isak Kamara. Preng Gjikola