Mallkimi “shqiptar”, Higuain sulmon tifozët
Juventini: E lehtë të flasësh nga divani, por kualifikohemi
Deri më 1 tetor 2017 sh konte gjithçka mirë... Penallti për Juventusin? Goli ishte i sigurt! Te pika e bardhë paraqitej gjithmonë ai, Paulo Dibala, një "snajper" i pagabueshëm: 14 goditje në Serinë A, 14 gola. Por papritur, në rrugën e tij përballet me Etrit Berishën: minuta e 90-të e Atalanta-Juve dhe numri 1 i Gasperinit ndalon argjentinasin, me ndeshjen që mbyllet 2-2. Bardhezinjtë largohen nga Bergamo me dy pikë të lëna rrugës. Kalojnë dy javë, në "Allianz Stadium" luhet Juventus-Lacio. Duglas Kosta jep avantazhin, ndërsa Imobile me një dopietë përmbys. Minutat shtesë të ndeshjes, sërish Dibala te pika e bardhë, por sërish një tjetër portier shqiptar, Thomas Strakosha, e ndal sërish dhe i mohon Juves që të marrë qoftë edhe një pikë. Tri në total të humbura, të tria për "faj" të shqiptarëve të portës. Kjo është një goditje shumë e rëndë duke parë se skuadra e një tjetër shqiptari, Napoli i Elseid Hysaj Hysajt vazhdon marshimin e tij të frikshëm në krye të Serisë A. Dhe sikur të mos kishte qenë për dy portierët e Kombëtares kuqezi, që luajnë në Itali, sot, të paktën në kampionat, Juventusi do të kryesonte me dy pikë përpara Napolit. Dhe ndoshta, ky mallkim "shqiptar" po vazhdon që të zgjerohet edhe në Ligën e Kampioneve. Të martën në mbrëmje, luhet Juve-Totenhem. Bardhezinjtë e nisin me një vrull të frikshëm, 2-0 pas vetëm 8 minutash lojë dhe goli i dytë i Higuain vjen nga pika e bardhë. Gjithsesi, saktësia e "Pipitas" zgjat deri në minutën e 45-të sepse shansi, që i jepet për të goditur sërish në rrjetë nga 11-metrat për ta dërguar sfidën në 3-1, sfumon. Argjentinasi shkund traversën, ndërsa në pjesën e dytë do të vijë edhe barazimi i Totenhemit, që detyron "Zonjën e Vjetër" të bëjë ndeshjen e jetës në tempullin e "Uemblit", më 7 mars, nëse duan që të vazhdojnë në Champions. Kaq ka mjaftuar që tifozët torinezë të ndahen mes tyre, ndonëse shumë prej tyre akuzojnë Higuainin për barazimin e djeshëm: "Në 2015-ën, me një penallti të gabuar ndaj Lacios, la Napolin pa Champions. Po në atë vit, kundër Kilit, me gabimin e tij Argjentina humbi Kupën e Amerikës. Ndërsa me Totenhemin ishte e pafalshme. Nuk e duam më Higuainin te pika e bardhë", ishin komentet e tifozëve, të cilat kanë nervozuar jo pak numrin 9 të Juves, i cili u kundërpërgjigj në rrjetet sociale. "Është e thjeshtë të flasësh duke
parë ndeshjen nga divani i shtëpisë dhe të shfrysh vrer. Deri te 2-0 ishte gjithçka perfekte, ndërsa te 2-2, mendimi ndryshoi shpejt. Mua nuk më interesojnë këto detaje dhe u dërgoj një përqafim vetëm atyre tifozëve që e duan vërtet Juven. Tani do të shkojmë në Londër dhe do të kthehemi të kualifikuar që aty".