Reagon FSHF: Mbështesim luftën kundër trukimeve
Institucioni i futbollit shqiptar ka reaguar dje pas zbardhjes së raportit për klubin e Skënderbeut dhe dënimin e mundshëm që korçarët pritet të marrin. FSHF ka bërë dy komunikata, fillimisht për raportin, e më pas për denoncimin e UEFA-s lidhur me kërcënimin që kanë marrë inspektorët e Disiplinës për çështjen e klubit të Skënderbeut. "FSHF ka marrë informacionet e nevojshme lidhur me dokumentin e publikuar, i cili është relacioni i inspektorëve të UEFA-s, drejtuar Komisionit të Disiplinës dhe jo një vendim disiplinor. Informacione këto, të domosdoshme për të pasur një qëndrim të konsultuar institucional dhe publik. Ndonëse FSHF po e ndjek me vëmendje ecurinë e procesit disiplinor ndaj Skënderbeut, vlen të theksohet se kjo është një çështje që i përket drejtpërdrejt klubit anëtar (Skënderbeu) dhe vetë UEFAs. FSHF do të jetë e hapur për çdo vendim disiplinor që mund të vijë në rrugë zyrtare nga trupat gjykuese të UEFA-s për rastin në fjalë", thuhej ndër të tjera në komunikatën e parë për shtyp. PËR UEFA-n
Pas qëndrimit të UEFA-s, menjëherë FSHF-ja bëri një reagim të dytë në faqen zyrtare të saj. "Federata Shqiptare e Futbollit distancohet plotësisht nga ngjarja më e fundit, ku persona anonimë kanë cenuar integritetin moral dhe kanë shantazhuar inspektorët e UEFA-s në punën e tyre investigative. FSHF inkurajon autoritetet policore për të zbardhur deri në fund origjinën e këtyre telefonatave intimiduese dhe të dënueshme. Si në çdo moment, edhe këtë radhë ajo është e gatshme të bashkëpunojë me UEFA-n dhe me autoritetet përkatëse për zbardhjen sa më shpejtë të ngjarjes, e cila duhet të vërë përpara përgjegjësisë ligjore autorët. FSHF shprehet e angazhuar maksimalisht në betejën kundër ndeshjeve të fiksuara. Federata e futbollit mbetet në solidaritet të plotë me UEFA-n në misionin e përbashkët kundër fenomenit të trukimit, duke ofruar çdo potencial të sajin bashkëpunues. Të tillë mekanizma kërcënues kanë vetëm një fund të sigurt, atë të ndëshkimit nga forca e ligjit", citohej nga FSHF-ja.