Lani: Besëlidhja është në garë, ndalim Kastriotin
Lezhjanët e Besëlidhjes dje pasdite iu dhanë fund përgatitjeve për javën e 16-të të kampionatit. Për vetë pozitat dhe objektivat e këtyre dy skuadrave, kjo ndeshje do të prodhojë spektakël, pse jo edhe gola, por gjithçka do të vërtetohet në përballjen e nesërme (sot) në arenën e Besëlidhjes. Të gjithë titullarët e Besëlidhjes pa përjashtim janë në dispozicion të Gledis Lanit, ndaj i mbetet atij që të selektojë një formacion që do t'i duket më i miri. Gjatë një bisede për "Panorama Sport" trajneri Gledis Lani u shpreh: "Pavarësisht zhurmës mediatike, sfida e së shtunës ndaj Kastriotit është si gjithë të tjerat, pasi sapo kemi kaluar gjysmën e kampionatit dhe llogaritë nuk mund të bëhen që tani. Gjatë të gjithë javës skuadra është stërvitur normalisht duke i përmbushur kërkesat e programit dhe për këtë jam i kënaqur, pasi shpresoj se i njëjti trend do të vijojë edhe në përballjen me kundërshtarin. Kastrioti dihet e po e kryeson grupin që në fillimet e sezonit dhe kjo dihet se është falë punës dhe përpjekjeve të tyre, por në sport, sidomos në futboll, nuk varet gjithçka nga këmbët e futbollistëve, apo rreshtimet dhe taktikat e stafit teknik, por janë edhe disa faktorë të jashtëm që ndikojnë drejtpërdrejt në rezultate si fati apo gjykimi. Gjithsesi, shpresoj se të shtunën do të kemi një ndeshje 'fairplay' ashtu siç është tradita këtu në Lezhë. Dihet se në kategorinë tonë nuk ka ndonjë diferencë të madhe në cilësinë e skuadrave mes tyre, pavarësisht pikëve, fitorja le t'i buzëqeshë ekipi që gabon më pak", përfundoi Lani. Preng Gjikola