Nëse Çalhanoglu luan siç di, Milani anon majtas
Shenjadalluese e Milanit të Gatuzos është gjallëria. Ekipi shfaqet më i freskët, këmbët përgjigjen dhe skuadra ka një formë të lartë fizike, çka e dëshmojnë edhe ndeshjet e fundit, në të cilat trajneri ka bërë fare pak ndryshime, madje, edhe ato të detyruara nga skualifikimet. Repartet duken më të afërt me njëri-tjetrin, me lojtarët që ruajnë distancat dhe shfaqen të gatshëm të ndihmojnë shokët në vështirësi.
Pikërisht falë kësaj kompaktësie, kuqezinjtë mundën të përballojnë valën goditëse të Ludogoretsit në ndeshjen e parë të vlefshme për 1/16-at e Ligës së Europës. Me kalimin e minutave, Milani i shkërmoqi bullgarët, por vështirësitë e sfidës u theksuan në intervistat e protagonistëve pas takimit. Më shume se sa një projekt taktik, djemtë e Gatuzos shfaqen me entuziazëm dhe shpejtësi në veprime. Edhe në momentin kur Ludogorets po sulmonte, kuqezinjtë patën përulësinë të njohin forcën e rivalit, të tërhiqen dhe të godasin në momentet më të volitshme kur, siç thuhet në të tilla raste, kundërshtari "shfryhet". Zgjidhjet - Ka momente kur ky Milani nuk luan si duhet ose, më saktë, si mundet. Zgjidhja kuqezi bie mbi të "ashtuquajturit" topa të dytë me Bonuçin që, me të djathtën, dërgon topa të gjatë, të cilët janë punë shtesë për sulmuesin kryesor (Kutrone), i cili duhet ose t'i ulë, ose t'i pasojë për shokët e krahut(Suso e Çalhanoglu). Bariqendra e skuadrës është jetike në të tilla manovra, me skuadrën që i beson gjithmonë e më shumë Hakan Çalhanoglusë. Turku është rikthyer në nivelet e Leverkuzenit dhe, sa herë ka topin, shfaqet i sigurt për hapin e radhës. Nëse Suso është rrezik për gola, numri 10 kuqezi është një asistues i frikshëm, sidomos kur në zonë është Kutrone. Dy gola në fotokopje (Lacio dhe Ludogorets) me të njëjtën formulë janë sinjal që disa automatizma, nëse nuk janë pjesë e skemave, nuk janë as rastësi.
Turku - Më Çalhanoglunë që shpik dhe Kalabrian që mbështet, Milani shfaq më shumë rrezikshmëri në të majtë. Sulmuesi i krahut lëviz shpejt e kroson po aq shpejt. 51 topat e luajtur në transfertën bullgare dhe tri raste për gol të krijuar janë treguesi më i qartë i momentit brilant që po kalon turku, sidomos edhe në aspektin fizik ku po shfaq rritje të dukshme. Saktësia në pasim, 30 nga 34 të suksesshme, është arma më shumë e zbuluar nga Gatuzo që në çdo intervistë e ka mbrojtur 23-vjeçarin dhe jo vetëm falë aftësive goditëse të shfaqura në "Milanello". Duelet ajrore janë një tjetër pikë e fortë e Çalhanoglusë, i cili i fitoi të gjitha në takimin e fundit (4 në 4). Në këtë fazë të sezonit është pikërisht turku njeriu më "tepër" i ekipit, me punë thelbësore në fazën mbrojtëse dhe me ide të dobishme në atë sulmuese, ndaj mbetet interesante se çfarë do të shpikë Rino kur fantazisti të ketë nevojë për pushim. Borini është i paralajmëruar për të qenë gati dhe, me sa duket, është. Dy gola në dy takimet e fundit, ku është aktivizuar në dhjetë minutat e fundit, janë një kartëvizitë e mirë për sulmuesin e huazuar në verë nga Sandërlendi.