Takaj: Rrëzojmë çdo akuzë, ka një klan anti-Skënderbe

Daja: “S'më ka zënë gjumi, presim karton jeshil, jo të kuq”. Ish-trajneri Josa: “Po ta kisha shok Takajn, nuk më largonte”

Ardjan Takaj thyen heshtjen dhe zgjedh të reagojë përmes faqes zyrtare të klubit në "Facebook". Presidenti i Skënderbeut hedh poshtë akuzat e UEFA-s, ndërsa tregon se ka një klan në Shqipëri kundër skuadrës së tij. Takaj paralajmëron se klubi që drejton do të ndjekë çështjen deri në shkallën më të lartë të gjykimit sportiv dhe penal. Në pritje të një vendimi zyrtar nga UEFA për dënimin e mundshëm, teksa nga inspektorët është kërkuar 10 vite jashtë kompeticionit europiane dhe 1 milion euro gjobë, kreu i klubit garanton tifozët korçarë se do të mbrojë nderin e Skënderbeut dhe sukseset e arritura deri më sot. DEKLARATA

"Të dashur tifozë bardhekuq dhe sportdashës të KF Skënderbeu, shpreh keqardhjen dhe shqetësimin tim nga 'bombardimi' që po i bëhet opinionit publik me lajme dhe sajesa. Në emër të Klubit të Futbollit 'Skënderbeu' kërkoj të sqaroj edhe njëherë se:

- KF Skënderbeu siguron UEFA- n dhe të gjithë partnerët e saj se nuk ka asnjë lidhje apo dijeni për kërcënimin që mund të jetë bërë ndaj personave që po hetojnë klubin tonë. Garancia më e madhe është historia e klubit tonë dhe natyra e qytetit që përfaqësojmë.

- Në emër të klubit dua të inkurajoj edhe njëherë organet ligj- zbatuese për zbardhjen e çështjes dhe nxjerrjen para përgjegjësisë të autorëve të vërtetë të kësaj ngjarjeje.

- KF Skënderbeu siguron të gjithë opinionin sportiv dhe në mënyrë të veçantë tifozërinë tonë, se po ndjek me vëmendje dhe qetësi hetimin e nisur nga kompani që kërkojnë të justifikojnë milionat që përfitojnë nga UEFA dhe ' klani' anti-Skënderbeu në vendin tonë. Sigurojmë se akuzat e tyre do të rrëzohen një e nga një dhe, nëse do të jetë e nevojshme, deri në shkallën më të lartë të gjykimit sportiv ose penal.

- Si përfundim, në emër të klubit, ju siguroj se do të vazhdojmë rrugëtimin tonë për të realizuar objektivat sportiv të klubit, por tani na lind dhe detyrimi për të mbrojtur nderin dhe sukseset e arritura deri më sot. Ju sigurojmë së do të shohim përpara për suksese edhe më të mëdha. Me respekt, Ardjan Takaj!".