Bajern tregon muskujt, përmbys në minutën 91
Skuadra e trajnerit Hejnkes vuan, por është vetëm 4 fitore larg titullit kampion
Bajerni i Mynihut nuk ndalet as në "Volk swagen Arena" të Volfsburgut në praninë e 30 mijë shikuesve. Kampionët, tashmë me njërën dorë te titulli, sigurojnë fitoren e 5 radhazi në po aq takime të luajtura. Festa duket më pranë në Mynih dhe tani ata mund të mendojnë të qetë për ndeshjen e Champions- it kundër Beshiktashit.
NDESHJA - Trajneri Hejnkes nuk aktivizoi disa nga lojtarët më të mirë në formacionin e parë. Levandovski, Humels, Kimish, Boateng dhe Myler e nisën takimin nga stoli. Hejnkes ia besoi mbrojtjen Martinezit me Bernat dhe Rafinja në krah. Në mesfushë Tiago nga minuta e parë me Tolison dhe Rudi. Vagner i vetëm në sulm me "Robbery" në krah të tij. Volfsburgu iu kundërpërgjigj me një 4-2-31 ku ra në sy mungesa e Mehmetit dhe aktivizimi i Origit nga minuta e parë. Volfsburgu e nisi më mirë takimin duke kaluar në avantazh ne minutën e 8- të, kur Didavi shënoi me kokë gjatë një goditje këndi. Bajerni në disavantazh filloi të reagonte duke pasur disa mundësi për të barazuar me Vagner dhe, më pas, me Roben. Por pjesa e parë mbyllet me avantazhin e "Ujqërve". Roben humbi shansin më të mirë për të barazuar në minutën e 56-të. Holandezi nuk arriti të shënonte nga pika e bardhë, portieri Kastles arrin të presë penalltinë. Por, në të 64-t lojtari shërben në zonë për Vagner që, me kokë, arrin ta dërgojë topin në rrjetë. Bajerni merr lojën në kontroll dhe hidhet në sulm për të shënuar golin e dytë. Hejnkes fut në lojë Mylerin dhe Levandovskin për Tiagon dhe Vagnerin. Vofsburgu rrezikon 2 herë më anë të kundërsulmit, por pa arritur të surprizojë bavarezët për herë të dytë. Jup kërkon që ekipi të luajë më shumë nga krahët duke i kërkuar Bernat të shërbejë në zonë për Levandovskin dhe Mylerin. Në minutën e 90-të, Roben arrin të depërtojë në zonën vendase duke detyruar Iterin ta tërheqë prej krahu. Përsëri penallti për Bajernin. Këtë radhë është Levandovski që merr përgjegjësinë për të ekzekutuar nga pika e bardhë. Polaku gjuan dhe shënon (penalltia e 17-të radhazi që nuk gabon). Kastles arrin ta prek pakë topin por pa sukses. Bajerni udhëheq 1-2 me një përmbysje spektakolare. Kampionët reaguan dhe nuk u dorëzuan deri në minutën e fundit duke marrë me vete në shtëpi 3-pikëshin e radhës. Ata udhëheqin të vetëm kampionatin në kuotën e 59 pikëve me një golavarazh prej 55 golash të shënuar dhe vetëm 18 të pësuar në 23 ndeshje të luajtura.
Në 11 javët e mbetura u duhen vetëm 4 fitore për të siguruar titullin. Lojtarët dhe trajneri mund të përgatiten të qetë për ndeshjen e Champions-it ndaj Beshiktashit në "Allianz Arena" në Mynih. Gjermanët synojnë kalimin e turit për të shkuar në çerekfinale.