Begeja premton kthesën: Marrim pikë në Shkodër
Teuta ka vazhduar gjatë ditës së djeshme përgatitjet për takimin e së hënës ndaj Vllaznisë dhe mungesa e vetme për trajnerin Begeja do të jetë ajo e Ardit Hilës, i cili ka plotësuar numrin e kartonëve të verdhë. Në një intervistë për "Panorama Sport", trajneri Begeja ka komentuar këtë takim, por edhe situatën në skuadër.
A ka presion te Teuta pas humbjeve të fundit dhe si po përgatitet ndeshja ndaj Vllaznisë?
E kemi marrë me qetësi ndeshjen e radhës, por që ka specifikë tjetër. Sigurisht që është kundërshtar direkt, kështu që nuk mendoj se është ndeshje shumë e vështirë, megjithatë ne po përgatitemi me qetësi. Besoj se do të shkojmë në Shkodër dhe do marrim rezultat pozitiv.
Do të jetë i vështirë një objektiv i tillë, duke parë edhe kontingjentin e lojtarëve që keni në dispozi- cion?
Merkato ka mbaruar dhe ne tani duhet t'i marrim më të mirën skuadrës. Ky është kontingjenti dhe nuk kemi ku marrim lojtarë të tjerë. Unë kam besim se, me këta futbollistë që kemi, do të dalim nga situata. E kam thënë edhe më
parë që skuadra problemin më të madh e ka psikologjik, as fizik dhe as taktik.
Si e keni gjetur skuadrën kur morët drejtimin, Nica ka thënë shpesh se lojtarëve u mungon grinta?
Kam gjetur një skuadër me djem të mirë, të cilët janë
në harmoni me njëri-tjetrin dhe mundohem të japin maksimumin si në stërvitje edhe gjatë ndeshjeve. Këtë problem e kam konstatuar edhe unë gjatë stërvitjes, duhet më shumë agresivitet sepse kampionati është shumë i fortë, kemi lënë pikë të sigurta në
ndeshjet e shkuara, kështu që tani e tutje do mundohemi t'i injektojmë më tepër për sa i përket agresivitetit.
Fitorja e fundit është arritur ndaj Vllaznisë në Shkodër. E shihni pozitive këtë statistikë?
Me Shkodrën gjithmonë
kemi realizuar ndeshje të mira, çdo ndeshje ka karakteristikat e veta dhe sigurisht nuk ngjajnë me njëra-tjetrën. Vllaznia vjen pas fitores në Lushnjë dhe ata kanë pretendimet e veta. Prandaj nuk dua të bëj paralelizma, por do të jetë ndeshje e fortë. Drilon Xhepollari