Zotërinjtë e fushave, ja skuadra që nuk urrehet kurrë
Nga Zaneti e Maldini deri te Pirlo e Henri
Futbolli është i përbërë nga një përzierje personazhesh që nga ata që ngjallin antipati e deri te ata, më së shumti kampionë, që gëzojnë admirim dhe respekt kudo që shkelin. Më shumë se një lojë, sporti i topkëmbës ndiqet anembanë globit dhe rrjedhimisht edhe ata që me paraqitjet e tyre e shndërrojë në një ëndërr për shumë dhe në realitet për një pakicë fatlume që shijon skenat më prestigjioze. Një skuadër që do të respektohej nga të gjithë është kjo idealja e një ekipi ëndrrash. Një të tillë është munduar ta nderojë edhe e përditshmja "The Sun", e cila ka stiluar ekipin e pamundur për t'u urryer. Një formacion me emra që në karrierën e tyre janë respektuar gjithmonë.
Porta
Gjithçka nis nga portieri. Kushdo që luan futboll, edhe në nivel amator e di se sa mall i rrallë janë, aq më tepër kur aftësitë prej kampioni mishërohen me respektin që lojtari ngjall te rivalët dhe tifozët kundërshtarë. Për një rol të tillë gjithçka do të ishte e sigurt në duart e legjendës së Juventusit, Xhanluixhi Bufon. Mbrojtja
Në të majtë për ekipin e "zotërinjve" më të dashur, pa dyshim Filip Lahm. Mbrojtësi gjerman u largua si kampion bote duke lënë një trashëgimi të rëndë për të riun Kimish. Në qendër besim edhe Karles Pujol, mbrojtës i ashpër në fushë, por një kampion jashtë saj. Kapiten i Barçës së madhe, katalansi do të ishte i duhuri përpara Bufonit. Për të plotësuar repartin e tërhequr duhen bezdisur dy kapitenët e fundit të Milanos, të cilëve Interi dhe Milani nuk u ka gjetur ende pasardhësit. Paolo Maldini (qendër) dhe Havier Zaneti në krah do të plotësonin kështu katërshen e të respektuarve. Mesfusha
Gjenialiteti i Andre Pirlos do të ishte i detyrueshëm për çdo mesfushë ideale, aq më tepër kur flitet për kampionë të padiskutuar. Fitimtar me Milanin dhe Juventusin, e për më tepër kampion bote në 2006n vendi i tij në regji është i garantuar. Në të njëjtën gjatësi vale Ksavi. Pas një jete te Barcelona dhe shpalljes si kampion bote e Europe me Spanjën e tij, katalanasi ende mbetet
një figurë ikonike, madje edhe në Katarin e largët ku po shpenzon ditët e fundit të një karriere të lavdishme. Reparti plotësohet nga Luka Modriç. Kroati admirohet jo vetëm për cilësitë teknike, por edhe për personazhin që përfaqëson kur nuk është i veshur me këpucët e futbollit.
Sulmi
Goleadorët, përveç gëzimit të tifozëve të tyre, shpesh ngjallin antipati te rivalët. Diçka e tillë mund t'i ndodhë kujtdo, por jo për Luis Nazario Da Limën, në artin e futbollit Ronaldo. Braziliani i përfshirë në këtë skuadër të dendur me "gentleman"- ë, për atë që i ka dhuruar futbollit është i respektuar anembanë botës. I njëjti diskutim vlen edhe për Tierri Henri, të cilit ende tifozët e Arsenalit i kushtojnë këngë. Francezi, me vrapimet dhe golat e tij, admirohej nga të gjithë, duke përfaqësuar denjësisht të gjithë parametrat e një "armiku" që meriton respekt. Formacioni në fjalë nuk mund të mbyllej me askënd tjetër përveç Ronaldinjos. Duartrokitjet dhe publiku madrilen i "Santiago Bernabeut" janë shembulli më konkret mbi respektin që rivali i një jetë i kushton një kampioni, pavarësisht fanellës që mban veshur...