Begeja: Asnjë presion, fitojmë me vlonjatët
Teuta ka hedhur pas krahëve humbjen me Vllazninë në Shkodër dhe në takimin me Flamurtarin kërkon rikthimin te fitorja. Përballë është një kundërshtar tepër i vështirë, megjithatë objektivi i durrsakëve është të dalin me pikë të plota nga ky takim. Në ndeshjen e fundit zhvilluar mes dy skuadrave, ku trajner ka qenë Gentian Begeja, durrsakët kanë dalë me pikë të plota. 44-vjeçari flet me optimizëm për sfidën me kuqezinjtë, teksa theksoi se Teuta rikthehet te fitorja. "Duke u referuar edhe te ndeshja që zhvilluam para një jave në Shkodër optimizmi qëndron, por jemi të vetëdijshëm se situata nuk është e mirë, të paktën në klasifikim", tha fillimisht Begeja për "Panorama Sport".
Nuk ke shumë kohë që e drejton skuadrën, megjithatë e ke ndjekur. Çfarë nuk funksionon me ekipin?
Me Vllazninë treguam një nivel të lartë, madje deri në momentin që pësuam, ishim ne ata që po e vinim në vështirësi kundërshtarin. Para golit, kundërshtari nuk pati asnjë rast, ndërsa ne iu afruam disa herë golit. Më pas, gjithçka mori një rrjedhë tjetër, siç ndodh rëndom ne pësuam një gol naiv. Problemi i Teutës është psikologjik dhe jo fizik apo taktik. Çfarë i ke thënë skuadrës gjatë kësaj periudhe për ta rregulluar këtë problem? Bashkë me stafin tim jam munduar tu flas lojtarëve, t'i mbaj afër. Gjendja është e mirë sidomos në stërvitje, por në ndeshje kemi probleme, është po ajo "sëmundje" e vjetër që ne ndëshkohemi me gola amatoresk. Element pozitiv apo negativ që në këtë moment të vështirë përballen me kundërshtarin më të fortë? Në kampionat nuk ka kundërshtar të lehtë, të gjithë janë shumë të fortë. Diferencat janë shumë të vogla. Për momentin, vetëm ne me Vllazninë jemi rivalë për mbijetesë. Do ketë ndryshime në formacion kundër Flamurtarit? Akoma nuk e kam kristalizuar formacionin për nesër (sot), por 90% e skuadrës do të jetë ajo që luajti në Shkodër. Do të ketë ndonjë ndryshim, por kam disa dilema.