Korabi, “finale” për shpëtim ndaj Besëlidhjes
Rikthehen Emiljano Veliaj dhe sulmuesi Lleshi. Klubi u bën thirrje tifozëve për mbështetje
Korabi dhe Besëlidhja do të luajnë një "finale" mbijetese sot në Peshkopi. Dibranët dhe lezhjanët luftojnë për të qenë në 5-shen e parë në fund të dy fazave të para, çka do të bënte që ekipet të ishin të qeta në fazën e tretë duke siguruar mbijetesën, pasi për sa i përket elitës, duket se gjithçka është mbyllur. Aktualisht, Korabi renditet në vendin e 6-të me 20 pikë, ndërsa Besëlidhja në vendin e 4-t me 21 pikë. Sfida e sotme mund të vendosë shumë për renditjen pas dy fazave të para kur kanë mbetur edhe dy takime për t'u luajtur. Skuadra dibrane e ka mbyllur me sukses seancën e fundit stërvitore dhe është akomoduar në hotel "Korabi" në Peshkopi për të qenë gati për takimin e sotëm që do të luhet në orën 14:00. Mbrojtësi
Briken Doçi, mbrojtësi i majtë i Korabit, në një prononcim për gazetën në lidhje me ndeshjen e sotme, shprehet: "Gjithë javën jemi stërvitur për këtë takim. Shpresojmë që të fitojmë, ndonëse përballë do të kemi një skuadër me vlera si ajo e Besëlidhjes. Me rikthimin e kapitenit Emiljano Veliaj dhe sulmuesit Antonio Lleshi, shpresojmë të marrim një 3-pikësh, pasi do të kemi dhe mbështetjen e tifozëve tanë. Ne synojmë të kapim 5-shen e parë dhe ky është momenti i duhur për të fituar dhe për të hedhur një hap të rëndësishëm drejt këtij objektivi. Me një grup të kompletuar dhe me mbështetjen maksimale të tifozërisë, kam shumë besim se do t'ia dalim që të jemi në 5-shen e parë pas dy fazave të para", përfundoi prononcimin e tij për gazetën, mbrojtësi i Korabit, Briken Doçi. "Rikthim i rëndësishëm është Emiljano Veliaj, i cili përfundoi dënimin, por edhe sulmuesi Anton Lleshi, i cili është rikuperuar plotësisht dhe do të luajë takimin e tij të parë përpara publikut Dibran. Ftojmë të gjithë sportdashësit dhe tifozët dibranë të jenë nesër (sot) të pranishëm në stadium, për të mbështetur skuadrën pasi janë faktor i rëndësishëm për Korabin", bënte thirrje klubi në "Facebook". Fatmir Zhuzhi