Besëlidhja, ndeshje nën presion
Trajneri Lani: Na kënaq edhe një pikë në këtë ndeshje, momenti të shpëtojmë që tani
Besëlidhja udhëtoi që dje drejt Peshkopisë për të qenë gati sot për sfidën e javës së 17-të që do të luajë në orën 14:00 në Peshkopi ndaj Korabit. Besëlidhja dhe Korabi bëjnë pjesë në Grupin A dhe në tabelën e renditjes i ndan vetëm një pikë diferencë. Në pamje të parë nuk duket ndonjë problem i madh, por sipas rregullores së kampionatit të Kategorisë së Parë që po aplikohet që nga sezoni i kaluar, këto dy skuadra janë në dy anët e vijës së kuqe në tabelën e renditjes, Besëlidhja lart dhe Korabi poshtë. Duke ju referuar situatës në fund të fazës së dytë, sfida mes Korabit dhe Besëlidhjes është përcaktuese për të dyja këto skuadra për vijueshmërinë në fazën e tretë, ku vetëm barazimi nuk ndryshon gjë. Një fitore e mundshme e lezhjanëve të Besëlidhjes ndaj Korabit i shpëton përfundimisht nga telashet e mbijetesës, ndërsa humbja hap probleme. LANI
Trajneri Gledis Lani është i qartë për situatën në të cilën ndodhet skuadra e tij, ndaj, gjatë gjithë javës, është munduar për ta karikuar ekipin nga të gjitha pikëpamjet. Në një prononcim për "Panorama Sport", tekniku lezhjan i Besëlidhjes, Gledis Lani, u shpreh: "Tashmë edhe fazës së dytë po i vjen fundi, ku skuadrave do t'u përgjysmohen pikët për të luftuar më pas për objektivat që kanë. Duke iu referuar kësaj rregulloreje, Besëlidhja momentale ndodhet në limitet, pra e dyzuar mes dy minigrupeve, ndaj vetëm fitorja do të na qetësonte. Por, në një ndeshje transferte edhe barazimi do të na ngushëllonte. Duke iu referuar kësaj situate, gjatë gjithë javës kemi punuar intensivisht për ta karikuar skuadrën maksimalisht nga të gjitha pikëpamjet për të dhënë maksimumin e mundshëm në Peshkopi përballë Korabit. Duke qenë të qartë se edhe kundërshtari ynë i radhës, Korabi, ka të njëjtin objektiv të çastit me ne dhe do të luftojë fort për pikët e tij, edhe ne jemi munduar për një kundërpërgjigje dinjitoze. Në sfida të tilla nuk mund të parashikosh asgjë, por ne jemi të qartë se nuk na lejohen gabime, pasi ajo skuadër, e cila do të jetë më e qartë në veprimet praktike në fushë, do të mund të ketë sukses", tha trajneri i Besëlidhjes, Gledis Lani, në prononcimin e tij për gazetën.