Kastrioti bën ndryshime, radha e blerjeve
Trajneri Samuel Nikaj pret fitoren, nuk sheh asnjë rival
Kastrioti do të presë sot Besën në fush ën e vet dhe do të kërkojë fitoren e radhës. Skuadra krutane, që është shkëputur 15 pikë nga vendi i dytë, është në rrugën e duhur drejt ngjitjes në Superiore. Ekipi i drejtuar nga Samuel Nikaj ka bërë një paraqitje shumë të mirë duke pësuar vetëm një humbje, atë ndaj Egnatias. Sot përballë Besës së vendit të fundit, Kastrioti do të kërkojë 3- pikëshin e radhës, gjë që do ta konsolidonte edhe më shumë në vendin e parë, dy javë nga fundi i fazës së dytë. Trajneri Nikaj do të ketë disa mungesa në këtë takim, ndërsa klubi i ka bërë thirrje tifozëve që të jenë sa më të shumtë në numër, në mbështetje të skuadrës. TRAJNERI
Në një prononcim për gazetën, trajneri i Kastriotit, Samuel Nikaj, në lidhje me ndeshjen e sotme, u shpreh: "Është një ndeshje e rëndësishme dhe, pavarësisht se kemi disa mungesa, nuk kemi alibi, thjesht duhet të bëjmë detyrën, të fitojmë ndeshjen me stilin tonë sulmues. Kemi futbollistë cilësorë të afruar në merkaton e janarit, siç janë Mulaj, Xhafa, Samson dhe Vatnikaj, të cilëve u ka ardhur momenti t'i demonstrojnë aftësitë e tyre", tha Nikaj. Më tej, i pyetur për afrimin e skuadrës së Erzenit në vendin e dytë, ekip me të cilin përballen pas një jave, tekniku shkodran i Kastriotit tha: "I respektoj dhe i vlerësoj të gjithë rivalët, por absolutisht nuk kam frikë asnjë, pasi Kastrioti ka rival vetëm veten", u shpreh Nikaj për gazetën. Ndeshja e sotme ndaj Besës do të luhet në orën 14:00, në stadiumin e Krujës dhe pritet që të ketë një numër të konsiderueshëm tifozësh, në mbështetje të skuadrës. Në 16 takime që kanë luajtur deri tani, krutanët kanë arritur 13 fitore, dy barazime dhe kanë pësuar vetëm një humbje. Ekipi është favoriti kryesor për t'u ngjitur në Superiore në kampionatin e ardhshëm.