Alegri mban në alarm Higuainin
“Infermieria pres të zbrazet, por nuk e di ende se kur mund të rikuperohet Gonzalo”
J uventusi i Masimiliano Alegrit rigjen Matuidin e Manxukiçin dhe me Dibalën janë gati për të marrë në dorë fatet e vijës së parë bardhezi. Argjentinasi duket një nga siguritë e trajnerit për formacionin që do të zbresë sot në fushë, në orën 18:00, kundër Atalantës. Bergamaskët vijnë pas zhgënjimit europian ndaj Dortmundit dhe do të kërkojnë revansh në kampionat. Strategu 50-vjeçari di rreziqet e sfidës, por preferon të përqendrohet te skuadra e tij duke deklaruar: "Më duhet ende të bëj disa verifikime, por kam provuar module me Dibalën si sulmues të vetëm. Kemi katër ndeshje të rëndësishme dhe është e pamendueshme që Paolo t'i luajë të gjitha nga fillimi. Ai vjen pas një dëmtimi dhe duhet ta menaxhojë me kujdes". Dyshimet mbi formacionin dhe veçanërisht mbi Gonzalo Higuainin ishte lajtmotivi i konferencës së djeshme, ku në lidhje me "Pipitan" deklaroi: "Gjatë javës Gonzalo është stërvitur i vetëm dhe vështirë se do ta kem në dispozicion për ndeshjen me Atalantën. Realisht nuk kemi ende një datë për rikuperimin e tij dhe kjo gjë më shqetëson". Lajmi i mirë për trajnerin janë rikuperimet e Matuidit, Barzaljit dhe Manxukiçit, ndërsa pret ende lajme nga infermieria: "Disa nga djemtë kanë lënë pas dëmtimet, ndërsa De Shiljon do ta vlerësojmë përsëri gjatë javës së ardhshme. Për Kuadradon ende nuk mund të flitet për afate rikthimi". Ndaj Atalantës, Juventusi rigjen edhe Bufonin në katërkëndësh, por kjo dihej dhe konfirmimi vjen nga fjalët e Alegrit: "Xhixhi ndaloi në derbi sepse e kishim programuar. Lihshtajner do të luajë në të
djathtë, teksa duhet ende të vendos për qendërmbrojtësit, ku ka vend vetëm për njërin mes Ruganit dhe Benatias. Në mesfushë do të luajnë Matuidi dhe Pjaniç, por të tretin do ta vendos pak përpara ndeshje. Në garë janë njëri mes Sturaros, Bentankurit dhe Markzios".
Për këtë të fundit, Alegri gjeti kohën të sqaronte edhe zërat në lidhje me largimin e mesfushorit duke thënë: "Me Markizion nuk kam folur vetëm sepse nuk ishte e nevojshme, pasi nuk e pashë veten të përfshirë nga postimi i bashkëshortes së tij".